अमळनेर तालुक्यातील जानवे येथे ६६ वर्षीय वृद्धाची गळफास घेऊन आत्महत्या
अमळनेर पोलिसांत अकस्मात मृत्यूची नोंद
अमळनेर (विशेष प्रतिनिधी): अमळनेर तालुक्यातील जानवे येथे एका ६६ वर्षीय वृद्धाने गोठ्यातील पत्र्याच्या खाली असलेल्या लाकडी दांडीला रुमाल आणि प्लास्टिकच्या पट्टीच्या साहाय्याने गळफास घेऊन आत्महत्या केल्याची दुर्दैवी घटना घडली आहे. फकिरा पोपट पाटील (वय ६६, मूळ रा. कल्ले, ता. शिंदखेडा, जि. धुळे, ह.मु. जानवे, ता. अमळनेर) असे मृत वृद्धाचे नाव आहे. ९ ऑगस्ट २०२६ रोजी ही घटना उघडकीस आली.
मिळालेल्या माहितीनुसार, ९ ऑगस्ट रोजी संशयितरीत्या फकिरा पाटील हे गोठ्यातील पत्र्याखालील लाकडी दांडीला रुमाल व प्लास्टिकच्या पट्टीने गळफास घेतलेल्या स्थितीत आढळून आले. ही बाब निदर्शनास येताच नातेवाईक व स्थानिक ग्रामस्थांच्या मदतीने त्यांना तातडीने खाली उतरवून खाजगी वाहनाने अमळनेर येथील ग्रामीण रुग्णालयात उपचारासाठी दाखल करण्यात आले.
मात्र, तेथील वैद्यकीय अधिकाऱ्यांनी सायंकाळी ६:३० वाजेच्या सुमारास त्यांना तपासून मृत घोषित केले. या प्रकरणी खबर दिल्यावरून अमळनेर पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये अकस्मात मृत्यूची नोंद करण्यात आली आहे.
