जळगाव पोलिसांचा अभिनव उपक्रम

गुन्हेगारांची संपूर्ण कुंडली असणारा ‘क्रिमिनल डोजियर M.O.B डेटा बेस’ तयार करण्याची मोहीम सुरू

जळगाव ( प्रतिनिधी ) – जळगाव जिल्हा पोलिसांनी गुन्हेगारीविरोधात मोठे पाऊल उचलत जिल्ह्यातील सर्व पोलिस स्टेशन हद्दीत व्यापक मोहीम सुरू केली आहे. गुन्हेगारांची सविस्तर माहिती एका ठिकाणी उपलब्ध व्हावी यासाठी “क्रिमिनल डोजियर M.O.B (Modus Operandi Bureau) डेटा बेस” तयार करण्यात येत असून, या माध्यमातून प्रत्येक गुन्हेगाराची संपूर्ण कुंडली पोलिसांकडे उपलब्ध होणार आहे.

दिनांक २३ मे २०२६ पासून सुरू करण्यात आलेल्या या मोहिमेत हिस्ट्रीशीटर्स, हॅबिच्युअल ऑफेंडर्स, शरीराविरुद्ध व मालमत्तेविरुद्ध गुन्हे करणारे आरोपी, टवाळखोर, प्रतिबंधात्मक कारवाईतील आरोपी तसेच इतर गुन्हेगारांना संबंधित पोलिस स्टेशनमध्ये बोलावून त्यांचे M.O.B / Interrogation Forms भरून घेतले जात आहेत.

काय आहे ‘क्रिमिनल डोजियर M.O.B डेटा बेस’?

जिल्हा पोलिसांनी अत्यंत बारकाईने आणि अभ्यासपूर्वक विशेष फॉर्म तयार केला असून त्यामध्ये संबंधित गुन्हेगारांची सखोल माहिती संकलित केली जात आहे.

या फॉर्ममध्ये खालील बाबींचा समावेश करण्यात आला आहे :

कुटुंबाचा संपूर्ण तपशील
आधार कार्ड व पॅन कार्ड माहिती
मालमत्ता व वाहनांचा तपशील
सोशल मीडिया अकाउंट्स
शारीरिक खुणा व टॅटू
मित्रपरिवार व संपर्क
पूर्वीचे गुन्हे व त्यांची स्थिती
गुन्हा करण्याची विशिष्ट पद्धत
कार्यक्षेत्र व हालचाली
व्यसनाधीनता व कर्जाची माहिती

या सर्व माहितीमुळे गुन्हेगारांचे नेटवर्क, त्यांची कार्यपद्धती आणि हालचालींचे विश्लेषण करणे पोलिसांना अधिक सोपे होणार आहे.

मोहिमेमागील प्रमुख उद्देश

✅ प्रत्येक पोलिस स्टेशनकडे गुन्हेगारांचा अद्ययावत आणि सविस्तर डेटाबेस तयार करणे.

✅ गुन्हा घडल्यानंतर विविध पोलिस स्टेशनमध्ये माहितीची त्वरित देवाण-घेवाण शक्य करणे.

✅ गुन्हेगारांमध्ये पोलिसांचा वचक आणि कायद्याचा धाक निर्माण करणे.

✅ फरार आरोपींच्या मालमत्ता व इतर तपशीलांच्या आधारे जप्ती व कठोर कारवाई सुलभ करणे.

✅ नवीन अधिकारी व अमलदारांना स्थानिक गुन्हेगारांची माहिती आणि प्रत्यक्ष ओळख सहज उपलब्ध करून देणे.

✅ पोलिस स्टेशन समोरील आवारात प्रक्रिया राबवून गुन्हेगारीचे सार्वजनिक खच्चीकरण करणे आणि समाजात कायद्याबद्दल विश्वास निर्माण करणे.

गुन्हेगारी नियंत्रणासाठी महत्त्वाचे पाऊल

जळगाव जिल्हा पोलिसांचा हा उपक्रम राज्यातील इतर जिल्ह्यांसाठीही आदर्श ठरण्याची शक्यता व्यक्त होत आहे. आधुनिक तंत्रज्ञान आणि माहिती संकलनाच्या मदतीने गुन्हेगारीवर प्रभावी नियंत्रण मिळवण्याच्या दृष्टीने हा उपक्रम अत्यंत महत्त्वाचा मानला जात आहे.