दुर्गंधी आल्याने प्रकार उघड; चार ते पाच दिवसांपूर्वी मृत्यू झाल्याचा पोलिसांचा अंदाज
जळगाव ( प्रतिनिधी ) – शहरातील रिंगरोड परिसरातील वृंदावन अपार्टमेंटमध्ये राहणाऱ्या एका महिलेचा कुजलेल्या अवस्थेतील मृतदेह शुक्रवारी आढळून आल्याने परिसरात खळबळ उडाली. प्रिया दिलीप श्रीश्रीमाळ (वय ४०, रा. वृंदावन अपार्टमेंट, हरेश्वर नगर) असे मृत महिलेचे नाव आहे.
रिंगरोडलगत असलेल्या वृंदावन अपार्टमेंटमध्ये प्रिया श्रीश्रीमाळ या एकट्याच वास्तव्यास होत्या. शुक्रवारी त्यांच्या घरातून तीव्र दुर्गंधी येऊ लागल्याने परिसरातील रहिवाशांना संशय आला. नागरिकांनी तत्काळ जिल्हापेठ पोलिसांना माहिती दिली.
माहिती मिळताच पोलिस कर्मचारी घटनास्थळी दाखल झाले. घराचा दरवाजा आतून लोटलेला असल्याने पोलिसांनी दरवाजा उघडून आत प्रवेश केला. त्यावेळी प्रिया श्रीश्रीमाळ या घरात मृतावस्थेत पडलेल्या आढळून आल्या.
मृतदेह कुजलेल्या अवस्थेत असल्याने त्यांचा मृत्यू साधारण चार ते पाच दिवसांपूर्वी झाला असावा, असा प्राथमिक अंदाज पोलिसांनी व्यक्त केला आहे. मृतदेह पुढील तपासणीसाठी शासकीय वैद्यकीय महाविद्यालय व रुग्णालयात पाठविण्यात आला आहे.
या घटनेमुळे परिसरात हळहळ व्यक्त होत असून जिल्हापेठ पोलीस पुढील तपास करीत आहेत.
