एटीएममधून पैसे काढण्यास मदत करण्याच्या बहाण्याने अज्ञात भामट्याची चलाखी
चोपडा ( प्रतिनिधी ) – शहरातील पाटील हॉस्पिटलसमोरील हिताची एटीएम केंद्रात एका २३ वर्षीय तरुणीची एटीएम कार्ड बदलून तब्बल ५० हजार रुपयांची फसवणूक झाल्याची घटना उघडकीस आली आहे. याप्रकरणी चोपडा शहर पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
याबाबत मिळालेल्या माहितीनुसार, शिवानी अशोक भिल (वय २३, रा. काजीपुरा, ता. चोपडा) या १२ मे २०२६ रोजी सकाळी सुमारे ११.३० वाजेच्या सुमारास पाटील हॉस्पिटलसमोरील हिताची एटीएममध्ये पैसे काढण्यासाठी गेल्या होत्या. त्यावेळी त्यांच्या मागे उभ्या असलेल्या अंदाजे ३० ते ३२ वर्षीय अज्ञात व्यक्तीने मदत करण्याच्या बहाण्याने विश्वास संपादन केला. त्यानंतर चलाखीने फिर्यादीचे एटीएम कार्ड बदलून घेतले.
यानंतर संबंधित भामट्याने चोपडा-शिरपूर रोडवरील बँक ऑफ इंडियाच्या एटीएममधून फिर्यादीच्या खात्यातून ५० हजार रुपये काढून फसवणूक केल्याचे समोर आले. हा प्रकार लक्षात आल्यानंतर फिर्यादीने पोलिसांत धाव घेत तक्रार दिली.
या प्रकरणी चोपडा शहर पोलीस ठाण्यात गुन्हा रजिस्टर क्रमांक २०७/२०२६ अन्वये भारतीय न्याय संहितेच्या कलम ३१८(४) प्रमाणे फसवणुकीचा गुन्हा दाखल करण्यात आला आहे. घटनेचा पुढील तपास पोलीस उपनिरीक्षक युवराज वाघुंजे करीत असून अद्याप आरोपीला अटक करण्यात आलेली नाही.
