क्रिकेटमध्ये ‘डीयूपीसीओपी रेंजर्स’ विजेते; बॅडमिंटनमध्ये ट्विंकल माळी व भारती शेजूळ यांची बाजी
जळगाव : राष्ट्रीय क्रीडा दिनाचे औचित्य साधून डॉ. उल्हास पाटील कॉलेज ऑफ फिजिओथेरपी (डीयूपीसीओपी) येथे विद्यार्थ्यांसाठी विविध क्रीडा स्पर्धांचे आयोजन करण्यात आले. क्रिकेट आणि बॅडमिंटन या स्पर्धांना विद्यार्थ्यांचा उत्स्फूर्त प्रतिसाद लाभला. विद्यार्थ्यांनी मोठ्या उत्साहाने सहभाग घेत क्रीडाकौशल्याचे दर्शन घडविले.
क्रिकेट स्पर्धेत डीयूपीसीओपी लायन्स, डीयूपीसीओपी टायटन्स आणि डीयूपीसीओपी रेंजर्स या तीन संघांनी सहभाग घेतला. अटीतटीच्या आणि रंगतदार सामन्यांमुळे स्पर्धेची उत्कंठा वाढली. उत्कृष्ट सांघिक खेळाचे प्रदर्शन करत डीयूपीसीओपी रेंजर्स संघाने विजेतेपद पटकावले, तर डीयूपीसीओपी टायटन्स संघाने उपविजेतेपद मिळविले.
बॅडमिंटन स्पर्धेलाही विद्यार्थ्यांचा उत्स्फूर्त प्रतिसाद मिळाला. अंतिम सामन्यात ट्विंकल माळी आणि भारती शेजूळ यांनी दमदार खेळाचे प्रदर्शन करत विजेतेपद आपल्या नावे केले. त्यांच्या उत्कृष्ट कामगिरीचे उपस्थितांनी कौतुक केले.
राष्ट्रीय क्रीडा दिनानिमित्त आयोजित या स्पर्धांमधून विद्यार्थ्यांमध्ये क्रीडाभावना, संघभावना, नेतृत्वगुण, शिस्त आणि निरोगी जीवनशैली यांचे महत्त्व अधोरेखित झाले. फिजिओथेरपीच्या विद्यार्थ्यांसाठी शारीरिक तंदुरुस्ती आणि आरोग्यदायी जीवनशैलीला विशेष महत्त्व असल्याने अशा क्रीडा उपक्रमांचा विद्यार्थ्यांच्या सर्वांगीण विकासासाठी निश्चितच फायदा होतो.
शैक्षणिक अभ्यासासोबतच शारीरिक तंदुरुस्ती, मानसिक स्वास्थ्य आणि सांघिक सहभाग यांचा समतोल साधण्यासाठी क्रीडा उपक्रम महत्त्वपूर्ण ठरतात. स्पर्धांच्या माध्यमातून विद्यार्थ्यांना खेळातील शिस्त, सहकार्य, नेतृत्व आणि खिलाडूवृत्तीचा प्रत्यक्ष अनुभव मिळाला. दिवसभराच्या या क्रीडा उपक्रमात विद्यार्थ्यांनी उत्साहाने सहभाग घेत स्पर्धांचा आनंद लुटला.
या उपक्रमाच्या यशस्वी आयोजनासाठी राहुल गिरी, डॉ. अमित जयस्वाल, डॉ. अनुराग मेहता, डॉ. आशिषकुमार पाटील तसेच महाविद्यालयातील शिक्षक व शिक्षकेतर कर्मचाऱ्यांनी उत्स्फूर्त सहभाग नोंदवून मोलाचे सहकार्य केले.
