विविध मैदानी स्पर्धांमध्ये विद्यार्थिनींचा उत्स्फूर्त सहभाग
जळगाव : डॉ. वर्षा पाटील वुमेन्स कॉलेज ऑफ कॉम्प्युटर ॲप्लिकेशन, जळगाव येथे राष्ट्रीय क्रीडा दिनाचे औचित्य साधून विविध मैदानी क्रीडा स्पर्धांचे उत्साहात आयोजन करण्यात आले. विद्यार्थिनींमध्ये क्रीडाप्रेम निर्माण व्हावे, त्यांच्यातील सुप्त क्रीडागुणांना वाव मिळावा तसेच शारीरिक व मानसिक आरोग्य सुदृढ राहावे, या उद्देशाने महाविद्यालयात विविध क्रीडा उपक्रम राबविण्यात आले.
भारतीय हॉकीचे महान खेळाडू व ‘हॉकीचे जादूगार’ म्हणून ओळखले जाणारे मेजर ध्यानचंद यांच्या जयंतीनिमित्त राष्ट्रीय क्रीडा दिन साजरा करण्यात आला. कार्यक्रमाच्या प्रारंभी मेजर ध्यानचंद यांच्या प्रतिमेस प्रो. वैजयंती असोदेकर यांनी पुष्पहार अर्पण करून अभिवादन केले.
यानंतर विद्यार्थिनींसाठी विविध मैदानी स्पर्धांचे आयोजन करण्यात आले. यामध्ये १०० मीटर धावणे, स्टँडिंग ब्रॉड जंप, शटल रन आदी क्रीडा प्रकारांचा समावेश होता. विद्यार्थिनींनी उत्स्फूर्तपणे सहभाग घेत आपल्या क्रीडाकौशल्याचे प्रदर्शन केले. स्पर्धांमुळे विद्यार्थिनींमध्ये उत्साहाचे आणि आनंदाचे वातावरण निर्माण झाले होते.
यावेळी प्रा. चंद्रकांत डोंगरे प्रामुख्याने उपस्थित होते. क्रीडा क्षेत्रामुळे विद्यार्थ्यांच्या सर्वांगीण विकासाला चालना मिळते. खेळांमधून विद्यार्थ्यांमध्ये संघभावना, नेतृत्वगुण, शिस्त, आत्मविश्वास आणि खिलाडूवृत्ती विकसित होते, असे मत यावेळी व्यक्त करण्यात आले.
कार्यक्रमास महाविद्यालयातील प्राध्यापक, शिक्षकेतर कर्मचारी तसेच विद्यार्थिनी मोठ्या संख्येने उपस्थित होत्या. स्पर्धा यशस्वी करण्यासाठी प्रा. चंद्रकांत डोंगरे व क्रीडा विभागातील कर्मचाऱ्यांनी विशेष परिश्रम घेतले. संपूर्ण कार्यक्रमाचे उत्कृष्ट व सुरेख सूत्रसंचालन प्रो. शिवानी महाजन यांनी केले.
राष्ट्रीय क्रीडा दिनानिमित्त आयोजित या उपक्रमातून विद्यार्थिनींना शिक्षणासोबतच क्रीडा आणि शारीरिक तंदुरुस्तीचे महत्त्व अधोरेखित करण्यात आले.
