जुन्या वादातून लोखंडी कोयत्याने सपासप वार; चाळीसगाव शहर पोलिसांत गुन्हा
चाळीसगाव ( प्रतिनिधी ) :- शहरातील डेराबर्डी भागातील एका बेकरीत काम करणाऱ्या तरुणावर जुन्या भांडणाच्या कारणावरून दोन जणांनी जीवघेणा हल्ला केल्याची धक्कादायक घटना समोर आली आहे. या प्रकरणी चाळीसगाव शहर पोलीस ठाण्यात खुनाच्या प्रयत्नाचा गुन्हा दाखल करण्यात आला असून आरोपींचा शोध सुरू आहे.
पोलीस सूत्रांकडून मिळालेल्या माहितीनुसार, अजय शिवाजी चव्हाण (वय 24, रा. डेराबर्डी, चाळीसगाव) हा तरुण समर्थ बेकरीमध्ये काम करत होता. 3 जून रोजी दुपारी दोन वाजेच्या सुमारास संशयीत आरोपी ममराज हरिलाल जाधव आणि त्याच्यासोबत असलेल्या एका अनोळखी व्यक्तीने बेकरीत प्रवेश केला.
जुन्या वादाचा राग मनात धरून संशयीत आरोपींनी अजय चव्हाण याच्यावर लोखंडी कोयत्याने हल्ला चढवला. हल्लेखोरांनी चेहरा, पाठ, हात आणि पायांवर सपासप वार करत त्याला गंभीर जखमी केले. हा हल्ला जीव घेण्याच्या उद्देशाने करण्यात आल्याचा आरोप फिर्यादीत करण्यात आला आहे.
जखमी अवस्थेत अजय चव्हाण याला उपचारासाठी दाखल करण्यात आले असून त्याच्या तक्रारीवरून चाळीसगाव शहर पोलीस ठाण्यात भारतीय न्याय संहिता कलम 109, 352, 351(2), 3(5) अन्वये खुनाच्या प्रयत्नाचा गुन्हा दाखल करण्यात आला आहे.
या प्रकरणाचा तपास पोलीस निरीक्षक अमितकुमार मनेळ यांच्या मार्गदर्शनाखाली सुरू असून आरोपींना अटक करण्यासाठी पोलीस पथके रवाना करण्यात आली आहेत. घटनेमुळे चाळीसगाव शहर परिसरात खळबळ उडाली आहे.
