एरंडोल ( प्रतिनिधी ) – तालुक्यातील नायरा पेट्रोल पंपावर पेट्रोल भरण्याच्या कारणावरून झालेल्या वादातून एका तरुणाला शिवीगाळ व मारहाण केल्याची घटना घडली. याप्रकरणी एरंडोल पोलीस ठाण्यात पाच जणांविरोधात गुन्हा दाखल करण्यात आला आहे.
ही घटना १८ मे २०२६ रोजी रात्री ८.३० वाजेच्या सुमारास एरंडोल-कसोडा रोडवरील नायरा पेट्रोल पंपावर घडली. अमोल कैलास पाटील (वय २५, रा. फरकांडे, ता. एरंडोल) यांनी याबाबत फिर्याद दिली आहे.
फिर्यादीनुसार, आरोपी पेट्रोल भरण्यासाठी पंपावर आले होते. त्यावेळी गर्दी असल्याने फिर्यादीने त्यांना थांबण्यास सांगितले. याचा राग आल्याने आरोपींनी शिवीगाळ करत मारहाण केली तसेच जीवे मारण्याची धमकी दिली.
या प्रकरणी पांड्या, दिपक, गोल्या मराठे, सागर धनगर व गोल्या वंजारी (पूर्ण नाव व पत्ता माहिती नाही) यांच्याविरोधात भारतीय न्याय संहितेच्या कलम १८९(१), १८९(२), ११५(२), ३५१(२), ३५२ अन्वये गुन्हा दाखल करण्यात आला आहे.
प्रकरणाचा पुढील तपास पोलीस निरीक्षक निलेश गायकवाड यांच्या मार्गदर्शनाखाली पोलीस कर्मचारी विजय पाटील करीत आहेत. अद्याप कोणालाही अटक करण्यात आलेली नाही
