घात झाल्याचा नातेवाईकांचा आरोप, जळगाव तालुक्यातील घटना
जळगाव (प्रतिनिधी) : तालुक्यातील मन्यारखेडा शिवारातील साईनगरात राहणाऱ्या विवाहितेने राहत्या घरात गळफास घेवून आत्महत्या केल्याची घटना गुरूवारी २४ एप्रिल रोजी रात्री १० वाजेच्या सुमारास उघडकीला आले आहे. याप्रकरणी नशिराबाद पोलीस ठाण्यात शुक्रवारी २६ एप्रिल रोजी अकस्मात मृत्यूची नोंद करण्यात आली आहे. दरम्यान, ही आत्महत्या नसून तिच्या पतीने मारहाण करून तिला गळफास दिल्याचा आरोप विवाहितेच्या माहेरच्यांनी केला आहे.
ममता रतिलाल राठोड (वय ३०, रा. साईनगर, मन्यारखेडा शिवार, ता. जळगाव) असे मयत झालेल्या विवाहितेचे नाव आहे. तालुक्यातील मन्यारखेडा शिवारातील साईनगर येथे ममता राठोड पती रतीलाल भोजू राठोड आणि एक मुलगा आणि मुलगी यांच्यासोबत वास्तव्याला होत्या. मोलमजूरी करून त्या उदरनिर्वाह करत होत्या. दरम्यान, गुरूवारी २४ एप्रिल रोजी रात्री १० वाजता राहत्या घरात ममता यांनी साडीने गळफास घेवून आत्महत्या केली. हा प्रकार लक्षात आल्यानंतर शेजारी राहणाऱ्या नातेवाईकांनी धाव घेत शासकीय वैद्यकीय महाविद्यालयात दाखल केले असता वैद्यकीय अधिकारी डॉ. सुशांत निकुंभ यांनी मयत घोषीत केले. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली आहे.
दरम्यान, शासकीय वैद्यकीय महाविद्यालयात विवाहितेच्या माहेरच्यांनी धाव घेवून एकच आक्रोश केला होता. ही आत्महत्या नसून विवाहितेला तिचे पती रतिलाल राठोड यानेच पैशांसाठी दारू पिऊन मारहाण करून गळफास दिल्याचा आरोप विवाहितेचा भाऊ मुकेश वसंत चव्हाण यांनी केला आहे. त्यांच्यावर गुन्हा दाखल करावा अशी मागणी माहेरच्यांनी केला आहे. घटनेप्रकरणी नशिराबाद पोलीस स्टेशनला अकस्मात मृत्यूची नोंद करण्यात आली आहे.
