पारोळा तालुक्यात घडली घटना
पारोळा (प्रतिनिधी) :- पारोळ्याजवळ राष्ट्रीय महामार्गावर ट्रक-महिंद्रा पिकप गाडीचा समोरासमोर अपघात झाल्याने त्यात एकाचा जागीच मृत्यू तर तीन जण जखमी झाल्याची घटना दि. २७ रोजी सायंकाळी साडेपाच वाजेच्या सुमारास राष्ट्रीय महामार्ग क्रमांक ५३ वर घडली.
तालुक्यातील विचखेडे गावाजवळ जळगावहून धुळ्याकडे जाणारी ट्रक क्रं, एमएच १५ जीव्ही ७८२७ ही भरधाव वेगाने समोरून धुळ्याकडून पारोळ्याच्या दिशेला येणारी महिंद्रा पिकप एम एच १९ सीवाय ५०७६ वर येऊन धडकली.(केसीएन)त्यात पिकअप चालक रफिक अहमद शरीफ अहमद (४०), अखिल अहमद अब्दुल सत्तार (रा धुळे), पूजा राजेश बागुल (२५,रा. सिद्धार्थ नगर, पारोळा) जखमी झाले. तर रविंद्र कौतिक बागुल (५०) रा. नगरदेवळा यांचा जागीच मृत्यू झाला.
जखमींना पारोळा कुटीर रुग्णालय येथे उपचारार्थ दाखल करण्यात आले आहे. दरम्यान रविंद्र बागुल हे आपल्या वहिनींना धुळे येथे दवाखान्यात उपचारासाठी घेऊन गेले होते. उपचार करून ते घरी येत असताना ही घटना घडली. पारोळा पोलिस स्टेशनला घटनेची नोंद करण्यात आली असून पुढील तपास पारोळा पोलिस करीत आहेत.
