यावल ( प्रतिनिधी ) – मुख्यमंत्री समृद्ध पंचायतराज अभियान २०२५-२६ अंतर्गत जाहीर झालेल्या जिल्हास्तरीय पुरस्कारांमध्ये यावल तालुक्यातील साकळी ग्रामपंचायतीने उल्लेखनीय कामगिरी करत तृतीय क्रमांक पटकावला आहे.
या यशाबद्दल ग्रामपंचायतीला २० लाख रुपयांचे पारितोषिक जाहीर करण्यात आले असून, साकळी गावाच्या शिरपेचात आणखी एक मानाचा तुरा रोवला गेला आहे.शासनाच्या ग्रामविकास विभागामार्फत जाहीर करण्यात आलेल्या या पुरस्कारांची घोषणा ६ नोव्हेंबर २०२६ रोजीच्या शासन निर्णयानुसार करण्यात आली आहे. यामध्ये साकळी ग्रामपंचायतीने जिल्हास्तरावर तिसरे स्थान मिळवत यावल तालुक्याचा गौरव वाढविला आहे.गावातील स्वच्छता, पायाभूत सुविधांचा विकास, शासकीय योजनांची प्रभावी अंमलबजावणी आणि ग्रामस्थांचा सक्रिय सहभाग या विविध बाबींमध्ये केलेल्या कामगिरीच्या जोरावर ग्रामपंचायतीने हे यश संपादन केले आहे.
सरपंच दीपक नागो पाटील, ग्रामपंचायत सदस्य आणि ग्रामस्थांनी एकत्रितपणे केलेल्या प्रयत्नांना या पुरस्काराच्या माध्यमातून मोठी पावती मिळाली आहे.या यशाबद्दल आनंद व्यक्त करताना सरपंच दीपक नागो पाटील यांनी पुरस्काराचे श्रेय संपूर्ण साकळी ग्रामस्थांना दिले.
गावाच्या स्वच्छतेसह विकासकामांमध्ये नागरिकांनी दिलेले सहकार्य, ग्रामपंचायत सदस्यांची साथ आणि वर्षभर राबविण्यात आलेल्या विविध उपक्रमांमुळे हे यश शक्य झाल्याचे त्यांनी सांगितले.दरम्यान, या पुरस्काराचे वितरण शासनामार्फत आयोजित करण्यात येणाऱ्या विशेष कार्यक्रमात ग्रामविकास व पंचायतराज मंत्री, संबंधित पालकमंत्री तसेच राज्यमंत्री यांच्या हस्ते करण्यात येणार आहे.
साकळी ग्रामपंचायतीच्या या यशामुळे यावल तालुक्याच्या विकासात्मक वाटचालीला नवी ओळख मिळाली असून, जिल्हाभरातून सरपंच दीपक नागो पाटील, ग्रामपंचायत सदस्य आणि ग्रामस्थांचे अभिनंदन होत आहे.
