एमआयडीसी पोलीस ठाण्यात खुनाचा प्रयत्न केल्याचा गुन्हा दाखल
जळगाव (प्रतिनिधी):- शहरातील मेहरूण परिसरातील अक्सा नगरमध्ये भांडण सोडवण्यासाठी गेलेल्या एका २५ वर्षीय तरुणावर तलवारीने प्राणघातक हल्ला केल्याची धक्कादायक घटना घडली आहे. या हल्ल्यात तरुण गंभीर जखमी झाला असून, याप्रकरणी एमआयडीसी पोलीस ठाण्यात तिघांविरुद्ध खुनाचा प्रयत्न केल्याचा गुन्हा दाखल करण्यात आला आहे.
शेख इस्माईल शेख असगर (वय २५, रा. छोटी मिल्लत शाळेजवळ, अक्सा नगर, मेहरूण, जळगाव) असे जखमी तरुणाचे नाव आहे. इस्माईल हा मजुरी करून पोट भरतो. शनिवारी, १८ एप्रिल रोजी रात्री ८:३० ते ९ वाजेच्या सुमारास अक्सा नगरमधील छोटी मिल्लत शाळेजवळ असलेल्या नाल्यापाशी इस्माईलचा मित्र अल्तमश आणि संशयित आरोपींमध्ये भांडण सुरू होते. हे भांडण सोडवण्यासाठी इस्माईल मध्यस्थी करत असताना, आरोपींनी संतापून त्याच्यावर हल्ला चढवला.
आरोपी शाहबाज उर्फ नगीना याने इस्माईलला जीवे मारण्याच्या उद्देशाने त्याच्या कपाळावर तलवारीने जोरदार वार केला, ज्यामध्ये तो गंभीर जखमी झाला. तसेच आरोपी तौसिफ पाशा उर्फ बिहारी याने लाकडी दांडक्याने मारहाण केली, तर उजेर पिरजादा याने लाथाबुक्क्यांनी मारहाण करत शिवीगाळ केली व जीवे मारण्याची धमकी दिली. या घटनेनंतर परिसरात खळबळ उडाली आहे. जखमी इस्माईलने दिलेल्या फिर्यादीवरून आरोपी शाहबाज उर्फ नगीना, तौसिफ पाशा उर्फ बिहारी आणि उजेर पिरजादा (सर्व रा. जळगाव) यांच्याविरुद्ध गुन्हा दाखल करण्यात आला आहे.
घटनेची माहिती मिळताच उपविभागीय पोलीस अधिकारी नितीन गणपुरे आणि एमआयडीसी पोलीस ठाण्याचे पोलीस निरीक्षक बबन आव्हाड यांनी घटनास्थळी भेट दिली. या प्रकरणाचा पुढील तपास पोलीस उपनिरीक्षक अशोक काळे करत आहेत. अद्याप या प्रकरणात कोणालाही अटक करण्यात आलेली नाही.
