जळगाव, (प्रतिनिधी) : रामटेक येथे आयोजित करण्यात आलेल्या भव्य कुस्ती स्पर्धेत जळगाव शहराचा नामवंत पैलवान सौरभ पवार याने आपल्या उत्कृष्ट खेळाचे प्रदर्शन करत प्रथम क्रमांक पटकावला आहे. या ऐतिहासिक विजयाबद्दल त्याला मानाची अडीच (२.५) किलो वजनाची चांदीची गदा देऊन गौरविण्यात आले. या घवघवीत यशामुळे जळगाव शहराच्या शिरपेचात मानाचा तुरा रोवला गेला असून, संपूर्ण जिल्ह्यातून त्याच्यावर कौतुकाचा वर्षाव होत आहे.
रामटेक येथील ‘परमात्मा एक बहुद्देशीय तालीम संघ’ आणि ‘श्री बळवंत वस्ताद व्यायाम शाळा’ यांच्या संयुक्त विद्यमाने सुपर मार्केट परिसरामध्ये या प्रेक्षणीय कुस्ती स्पर्धेचे आयोजन करण्यात आले होते. या स्पर्धेमध्ये महाराष्ट्रातील अनेक दिग्गज आणि नामांकित पैलवानांनी सहभाग घेतला होता. उपस्थित हजारो कुस्ती शौकिनांच्या साक्षीने हे चुरशीचे सामने पार पडले. या सर्व मातब्बर मल्लांवर मात करत जळगावच्या सौरभ पवारने अंतिम लढतीत उत्कृष्ट डावांचे प्रदर्शन करत विजय मिळवला आणि मानाच्या गदेवर आपले नाव कोरले.
या भव्य कुस्ती स्पर्धेला कार्यक्रमाचे उद्घाटक रामटेक विधानसभेचे आमदार आशिष जयस्वाल यांच्यासह परिसरातील अनेक राजकीय, सामाजिक क्षेत्रातील मान्यवर आणि कुस्ती क्षेत्रातील वस्ताद मंडळी उपस्थित होती. स्पर्धेचे नेटके सूत्रसंचालन आणि यशस्वी नियोजन तुषार सुभाशजी यादव यांनी केले. सौरभच्या या यशाबद्दल क्रीडा जगतातून आणि जळगावकरांकडून त्याचा विशेष सत्कार व अभिनंदन करण्यात येत आहे.
पैलवान सौरभ राजेश पवार यांचा मोबाइल क्रमांक: ९५९५३७१७१३
