भरधाव कार पलटी होऊन झाला होता भीषण अपघात
जामनेर (प्रतिनिधी) – जामनेर पोलीस स्टेशनच्या हद्दीत एका भरधाव कारचा भीषण अपघात झाल्याची घटना मंगळवारी समोर आली होती. या अपघातात दोन जणांचा मृत्यू झाला असून, अन्य ५ जण जखमी झाले आहेत. या प्रकरणी वाहन चालकाविरुद्ध जामनेर पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, १० नोव्हेंबर २०२६ रोजी संध्याकाळी देवपिंपरी फाटा, ता. जामनेर येथे हा अपघात घडला. संशयित आरोपी, कपिल भगवान पारखे याने त्याच्या ताब्यातील हुंडाई कंपनीची ग्रँड आय १० कार (क्र. एमएच-४७/के-५९१९) अत्यंत भरधाव वेगाने आणि हयगयीने चालवली. वाहन चालवताना त्याने रस्त्याची परिस्थिती पाहण्याकडे दुर्लक्ष केले, ज्यामुळे त्याचे कारवरील नियंत्रण सुटले आणि कार रस्त्याच्या कडेला असलेल्या चारीमध्ये पलटी झाली.
या भीषण अपघातात स्वतः चालक कपिल भगवान पारखे आणि रामू कुमार हे दोघे जण मयत झाले आहेत. याशिवाय गाडीतील इतर प्रवासी ब्रिजेश कुमार बुध्दीराम, धनजीराम, अनुराग कुमार आणि मोनू कुमार यांच्यासह फिर्यादी रणजीत हे दुखापतीमुळे जखमी झाले आहेत.
या प्रकरणी रणजीत श्यामजी चौधरी (वय २७, रा. पाडेपूर, वाराणसी, उत्तर प्रदेश, सध्या मुक्काम एन सेक्टर, एमआयडीसी जळगाव) यांनी जामनेर पोलीस ठाण्यात कायदेशीर फिर्याद नोंदवली आहे. फिर्यादीच्या तक्रारीवरून पोलिसांनी मृत चालक कपिल भगवान पारखे याच्यावर गुन्हा दाखल केला आहे. या प्रकरणाचा पुढील तपास सपोनि जयसिंग राठोड (नेमणूक जामनेर पोलीस स्टेशन) करत आहे.
