अत्याचार व ड्रग्ज प्रकरणात तपासाला वेग; संशयिताला वाढीव पोलीस कोठडी
जळगाव (प्रतिनिधी) : अल्पवयीन मुलीवर लैंगिक अत्याचार व ड्रग्ज पुरवठा प्रकरणातील तपासाला वेग आला असून पीडितेने अमली पदार्थांचे सेवन केले होते का, याची खात्री करण्यासाठी तिच्या रक्ताचे नमुने नाशिक येथील प्रयोगशाळेत तपासणीसाठी पाठविण्यात येणार आहेत. अहवाल प्राप्त झाल्यानंतर या प्रकरणातील काही महत्त्वाच्या बाबी स्पष्ट होण्याची शक्यता आहे.
पोलिसांनी दिलेल्या माहितीनुसार, पीडितेच्या तक्रारीनुसार तिच्या परिचयातील व्यक्तींनी तिला सिगारेट व अमली पदार्थांचे व्यसन लावल्याचा आरोप करण्यात आला आहे. त्यानंतर तिला मद्य पाजून तिच्यावर कारमध्ये तसेच शहरातील एका हॉटेलमध्ये लैंगिक अत्याचार करण्यात आल्याचा आरोप आहे. तसेच अश्लील छायाचित्रे व्हायरल करण्याची धमकी देऊन तिचा छळ करण्यात आल्याचेही तक्रारीत नमूद करण्यात आले आहे.
या प्रकरणी निर्मल दिनेश तिवारी (रा. प्रजापती नगर), जय चौधरी (रा. शिव कॉलनी) व गौरव पुरोहित यांच्याविरुद्ध पोक्सोसह विविध गंभीर कलमांन्वये गुन्हा दाखल करण्यात आला आहे.
संशयिताला दोन दिवसांची वाढीव कोठडी
या गुन्ह्यातील संशयित निर्मल तिवारी आणि जय चौधरी यांना पोलिसांनी अटक केली आहे. जय चौधरी याच्या पोलीस कोठडीची मुदत संपल्यानंतर त्याला न्यायालयात हजर करण्यात आले. यावेळी न्यायालयाने त्याला दोन दिवसांची वाढीव पोलीस कोठडी सुनावली. दरम्यान, तिसरा संशयित गौरव पुरोहित याचा पोलिसांकडून शोध सुरू आहे.
रक्त तपासणी अहवालाकडे लक्ष
पीडितेने दिलेल्या जबाबात तिला अमली पदार्थांचे सेवन करण्यास प्रवृत्त करण्यात आल्याचा आरोप केला आहे. त्यामुळे वैद्यकीय तपासणीचा भाग म्हणून रक्ताचे नमुने प्रयोगशाळेत पाठविण्याची प्रक्रिया सुरू करण्यात आली आहे. संबंधित अहवाल प्राप्त झाल्यानंतर तपासाला अधिक दिशा मिळण्याची शक्यता व्यक्त केली जात आहे.
ड्रग्ज पुरवठा साखळीचाही शोध
या प्रकरणाच्या अनुषंगाने अमली पदार्थ पुरवठा करणाऱ्या व्यक्तींचा शोध घेण्यासाठी पोलिसांनी स्वतंत्र पथके नियुक्त केली असून ड्रग्ज पुरवठा साखळीचा तपासही सुरू आहे.
