नशिराबाद (प्रतिनिधी) : पत्रकारांना कथितरित्या अश्लाघ्य शिवीगाळ करून जीवे मारण्याची धमकी दिल्याच्या प्रकरणाचा निषेध करत नशिराबाद पत्रकार संघाने शुक्रवारी नशिराबाद पोलीस ठाण्यात सहाय्यक पोलीस निरीक्षक योगिता नारखेडे यांना निवेदन सादर केले. संबंधित खासदार संजय दिना पाटील यांच्याविरुद्ध तातडीने गुन्हा दाखल करून कठोर कायदेशीर कारवाई करण्यात यावी, अशी मागणी निवेदनाद्वारे करण्यात आली.
निवेदनात म्हटले आहे की, लोकशाहीचा चौथा स्तंभ म्हणून पत्रकार समाजातील घडामोडी वस्तुनिष्ठपणे जनतेपर्यंत पोहोचविण्याचे महत्त्वाचे कार्य करतात. अशा परिस्थितीत पत्रकारांशी अपमानास्पद भाषा वापरणे, शिवीगाळ करणे तसेच जीवे मारण्याच्या धमक्या देणे हे केवळ पत्रकारांचा अवमान नसून प्रसारमाध्यमांच्या स्वातंत्र्यावर आणि अभिव्यक्ती स्वातंत्र्यावर झालेला थेट आघात आहे.
लोकप्रतिनिधींनी संविधानिक मूल्यांचे पालन करून लोकशाही संस्थांचा सन्मान राखणे अपेक्षित असताना अशा प्रकारचे वर्तन निषेधार्ह असल्याचे पत्रकार संघाने नमूद केले आहे. पत्रकारांना धमकावून त्यांचा आवाज दडपण्याचा कोणताही प्रयत्न लोकशाही व्यवस्थेस घातक असून अशा प्रवृत्तींना वेळीच आळा घालणे आवश्यक असल्याचेही निवेदनात म्हटले आहे.
या प्रकरणाची सखोल चौकशी करून दोषींवर कायद्यानुसार कठोर कारवाई करण्यात यावी तसेच पत्रकारांच्या सुरक्षिततेबाबत प्रशासनाने ठोस भूमिका घ्यावी, अशी मागणी नशिराबाद पत्रकार संघाने केली आहे. पत्रकारांवरील अशा प्रकारच्या धमक्या व दडपशाहीच्या घटना भविष्यात पुन्हा घडू नयेत, यासाठी कठोर संदेश देणारी कारवाई करावी, अशी अपेक्षाही संघटनेने व्यक्त केली.
सहाय्यक पोलीस निरीक्षक योगिता नारखेडे यांनी निवेदन स्वीकारून ते वरिष्ठ अधिकाऱ्यांकडे पाठविण्यात येईल व नियमानुसार आवश्यक ती कार्यवाही केली जाईल, असे आश्वासन दिले.
यावेळी नशिराबाद पत्रकार संघाचे सुनील भावसार, प्रा. विश्वनाथ महाजन, चंदन पाटील, हरीश पाटील, सुनील महाजन, सागर मोरे यांच्यासह संघटनेचे पत्रकार उपस्थित होते.
