भावाच्या शालकाचा चाकूने भोसकून खून; आरोपी स्वतःहून पोलिस ठाण्यात हजर
पाचोरा, (प्रतिनिधी) : पाचोरा शहरात घरगुती आणि मालमत्तेच्या वादाचे पर्यवसान थेट खुनात झाल्याची धक्कादायक घटना सोमवारी रात्री घडली. दीपक प्रकाश कानडे (वय ४४, रा. पाचोरा) यांची धारदार शस्त्राने वार करून हत्या करण्यात आल्याने शहरात एकच खळबळ उडाली आहे. या प्रकरणातील आरोपी संतोष कानडे याला पोलिसांनी ताब्यात घेतले असून घटनेमागे दीर्घकाळापासून सुरू असलेले कौटुंबिक वाद कारणीभूत असल्याची माहिती समोर आली आहे.
मिळालेल्या माहितीनुसार, दीपक कानडे यांच्या बहिणीचा विवाह आरोपी संतोष कानडे यांच्या भावासोबत झाला होता. मात्र संतोष याचा भाऊ मृत झाल्यानंतर संतोष आणि त्याची भावजई यांच्यात विविध कारणांवरून घरगुती वाद सुरू होते. या वादातून दोन्ही कुटुंबांमध्ये तणावाचे वातावरण निर्माण झाले होते.
सोमवारी हा वाद थेट पाचोरा पोलिस ठाण्यात पोहोचला. यावेळी संतोष कानडे यांच्या आई-वडिलांनी दीपक कानडे व त्यांच्या बहिणीवर मारहाणीचे आरोप करत तक्रार दिली. त्याचवेळी दीपक कानडे व त्यांच्या बहिणीनेही आपल्यालाही मारहाण झाल्याची तक्रार पोलिसांकडे नोंदविली. त्यामुळे दोन्ही बाजूंतील वाद अधिकच चिघळल्याचे सांगितले जात आहे.
दरम्यान, सोमवारी रात्री सुमारे ११ वाजेच्या सुमारास दीपक कानडे हे जामनेर रोड परिसरातून जात असताना संतोष कानडे याने त्यांना अडवून धारदार हत्याराने मानेवर वार केला. या अचानक झालेल्या हल्ल्यात दीपक गंभीर जखमी झाले. घटनास्थळी मोठी धावपळ उडाली असून नागरिकांनी त्यांना तातडीने उपचारासाठी रुग्णालयात दाखल केले. मात्र वैद्यकीय अधिकाऱ्यांनी तपासणीअंती त्यांना मृत घोषित केले.
घटनेची माहिती मिळताच पाचोरा पोलिसांनी घटनास्थळी धाव घेत पंचनामा केला आणि तपासाची चक्रे वेगाने फिरविली. प्राथमिक तपासात घरगुती व मालमत्तेच्या वादातूनच ही रक्तरंजित घटना घडल्याचे समोर आले आहे.
विशेष म्हणजे, घटनेनंतर आरोपी संतोष कानडे याने पळ काढण्याचा प्रयत्न न करता स्वतःहून पोलिस ठाण्यात हजर झाल्याची माहिती सूत्रांनी दिली. पोलिसांनी त्याला ताब्यात घेतले असून हल्ल्यासाठी वापरण्यात आलेले हत्यार जप्त करण्याची प्रक्रिया सुरू आहे.
या घटनेमुळे पाचोरा शहरात हळहळ व्यक्त होत असून कौटुंबिक वादाने घेतलेल्या हिंसक वळणाबद्दल नागरिकांमध्ये चिंता व्यक्त केली जात आहे. मृताच्या नातेवाईकांनी आरोपीवर कठोर कारवाई करण्याची मागणी केली असून उशिरापर्यंत गुन्हा नोंदविण्याची प्रक्रिया सुरू होती. पोलिसांकडून या प्रकरणाचा विविध अंगांनी सखोल तपास सुरू आहे.
