अग्निशमन दलाच्या तत्परतेमुळे मोठा अनर्थ टळला; दोन बंबांच्या साहाय्याने आगीवर नियंत्रण
जळगाव ( प्रतिनिधी ) – शहरातील एमआयडीसी परिसरातील के. के. कॅनजवळ असलेल्या एमआयडीसी पोलीस स्टेशन रोडवर आज दुपारी सव्वा दोन वाजेच्या सुमारास कपाशीच्या गाठींनी भरलेल्या एका कंटेनरला भीषण आग लागली. सुदैवाने, अग्निशमन दलाने वेळीच धाव घेतल्याने मोठी हानी टळली असून आगीवर पूर्णपणे नियंत्रण मिळवण्यात यश आले आहे.दरम्यान आगीमुळे हजारो रुपयांचे नुकसान झाले आहे.
मिळालेल्या माहितीनुसार, मॅक्स टेक्सकेम या कंपनीसाठी कपाशीच्या गाठी घेऊन जाणाऱ्या कंटेनरला (क्रमांक: HR 67 E 1873) अचानक आग लागली. दुपारी २:१३ वाजेच्या सुमारास डॉ. पल्लवी राणे यांनी या घटनेची माहिती अग्निशमन दलाला दिली. या कंटेनरमधील माल केतन चंद्रकांत राणे यांच्या मालकीच्या कंपनीचा होता. भररस्त्यात कंटेनरमधून धूर आणि आगीच्या ज्वाळा निघू लागल्याने परिसरात एकच खळबळ उडाली होती.
अग्निशमन दलाची तत्परता
घटनेची माहिती मिळताच मुख्य अग्निशमन अधिकारी अश्वजीत घरडे यांच्या मार्गदर्शनाखाली पथकाने तातडीने घटनास्थळी धाव घेतली. अग्निशमन दलाच्या दोन गाड्यांनी पाण्याचा मारा करून काही वेळातच आगीवर नियंत्रण मिळवले आणि आग संपूर्णपणे विझवली. यामुळे कंटेनरमधील उर्वरित साठ्याचे नुकसान टळले.
या मोहिमेत वाहन चालक देविदास सुरवाडे आणि नंदू खडके, तसेच फायरमन इक्बाल तडवी, शुभम सोनवणे, दीपक गवाडे, योगेश पाटील आणि विठ्ठल पाटील यांनी सक्रिय सहभाग नोंदवत आग विझवण्यास मोलाची मदत केली. आगीचे नेमके कारण अद्याप स्पष्ट झाले नसले, तरी ही आग उन्हाच्या तीव्रतेमुळे बंद कंटेनरच्या आत असलेल्या कपाशीने पेट घेतल्याने लागली असावी, असा प्राथमिक अंदाज वर्तवण्यात येत आहे.
“आगीची माहिती मिळताच आमचे पथक घटनास्थळी दाखल झाले. कपाशी हा ज्वालाग्राही पदार्थ असल्याने आग वेगाने पसरण्याची भीती होती, परंतु कर्मचाऱ्यांनी शिताफीने दोन गाड्यांच्या साहाय्याने पाणी मारून आग विझवली आणि परिस्थिती नियंत्रणात आणली.”
— अश्वजीत घरडे (मुख्य अग्निशमन अधिकारी, जळगाव मनपा)
