तरुण तडफदार उमेदवार महायुतीतर्फे, भाजपकडून मास्टर स्ट्रोकची शक्यता
जळगाव प्रतिनिधी – सध्या महाराष्ट्र मध्ये विधान परिषदेची निवडणूक लागली आहे. यामध्ये जळगाव जिल्ह्यातून १ जागा निश्चित झाली आहे. यासाठी महायुतीमध्ये आता विविध नावांची चर्चा सुरू झाली असून या निवडणुकीच्या निमित्ताने गुलाबराव विरुद्ध गुलाबराव हा सामना पुन्हा रंगणार असल्याची चर्चा रंगत आहे. ऐन वेळेला भाजपकडून मास्टरस्ट्रोक दिला जाण्याची शक्यता आहे.
महाराष्ट्रमध्ये नऊ जागांसाठी विधानपरिषदेची निवडणूक होणार आहे. या निवडणुकीसाठी जळगाव जिल्ह्यातून एक जागा आहे. या जागेसाठी सध्या भाजपमधून पाचोरा येथील अमोल शिंदे, रावेर तालुक्यातील नंदकिशोर महाजन, जळगावचे उद्योजक नंदकुमार आडवाणी यासह शिवसेना शिंदे गटाकडून पालकमंत्री गुलाबराव पाटील यांचे सुपुत्र तथा माजी जिल्हा परिषद सदस्य प्रतापराव पाटील यांचे नाव आघाडीवर घेतले जात आहे. मात्र दुसरीकडे आता गुलाबराव पाटील यांचे प्रतिस्पर्धी मानले जाणारे गुलाबराव देवकर यांचे घराणे देखील मैदानात उतरणार असल्याचे राजकीय वर्तुळात बोलले जात आहे.
देवकर परिवारातून विशाल देवकर हे निवडणुकीच्या रिंगणात येण्याची शक्यता आहे. याबाबत राजकीय क्षेत्रामध्ये तर्क वितर्कला उधाण आले आहे. मराठा समाजाचे प्रबळ उमेदवार विशाल देवकर हे निवडणुकीच्या रिंगणात उतरण्याची शक्यता आहे. तसेच प्रतापराव पाटील यांना उमेदवारी दिली तर महायुतीतील काही विरोधकही देवकर यांना मदत करण्याची शक्यता आहे. महायुतीमधील काही अंतर्गत विरोधक हे विशाल देवकर यांना मदत करू शकतात तर दुसरीकडे ऐन वेळेला भारतीय जनता पक्षाकडून मास्टरस्ट्रोक वापरला जाऊन विशाल देवकर यांना उमेदवारी दिली जाऊ शकते.
माजी पालकमंत्री गुलाबराव देवकर यांचे सर्वपक्षीय मित्र आहेत. हे सर्वपक्षीय मित्र विशाल देवकर यांना निवडणुकीच्या रिंगणामध्ये मदत करण्याची दाट शक्यता आहे. त्यामुळे त्यांची उमेदवारी जाहीर झाल्यास महायुतीचे उमेदवार म्हणून भाजपतर्फे विशाल देवकर यांना तिकीट मिळण्याची शक्यता दिसून येत आहे. राजकीय वर्तुळात याबाबत चर्चा घडून येत आहे.
विधान परिषदेसाठी मतदान आणि निकाल कधी?
महाराष्ट्र विधान परिषदेच्या ९ जागांसाठी निवडणूक जाहीर करण्यात आली आहे. विधान परिषदेच्या ९ जागांसाठी नियमित निवडणूक तर एका जागेची पोटनिवडणूक पार पडणार आहे. भारत निवडणूक आयोगाकडून महाराष्ट्रातील विधान परिषद निवडणुकीचा कार्यक्रम जाहीर केला आहे. विधान परिषदेच्या १० जागांसाठी १२ मे रोजी मतदान होणार आहे. १२ मे रोजी सकाळी ९ वाजल्यापासून दुपारी ४ वाजेपर्यंत मतदान होईल. तर १२ मे रोजीच निकाल जाहीर होणार आहे.
विधान परिषदेच्या एका जागेसाठी पोट निवडणूक होणार आहे. प्रज्ञा सातव यांच्या भाजप प्रवेशानंतर रिक्त असलेल्या परिषदेच्या जागेची पोटनिवडणूक सुद्धा १२ मे रोजी पार पडणार आहे. काँग्रेसमधून राजीनामा दिल्यानंतर प्रज्ञा सातव यांनी भाजपात पक्षप्रवेश केला होता. प्रज्ञा सातव यांच्या आमदारकीचा कार्यकाळ २७ जुलै २०३० पर्यंत होता. दरम्यान, ९ जागांसाठी नियमित निवडणूक तर एका जागेची पोटनिवडणूक पार पडणार आहे. या पोटनिवडणुकीच्या जागेवर महायुतीचा विजय निश्चित आहे. दोन्ही निवडणुकांसाठी वेगवेगळा सदस्यांचा कोटा असणार आहे. बहुमत असलेल्या भाजपकडेच पोटनिवडणुकीची जागा जाण्याची शक्यता आहे.
