६.५३ लाखांचा मुद्देमाल जप्त; कार, दुचाकी आणि मोबाईलही पोलिसांच्या ताब्यात
जळगाव (प्रतिनिधी) – जळगाव स्थानिक गुन्हे शाखेने (एलसीबी) अमली पदार्थांविरोधातील मोहिमेत मोठी कारवाई करत एमडी (मेफेड्रोन) या घातक अमली पदार्थासह तिघा संशयितांना अटक केली आहे. या कारवाईत अमली पदार्थांसह कार, दोन दुचाकी आणि मोबाईल असा एकूण ६ लाख ५३ हजार रुपयांचा मुद्देमाल जप्त करण्यात आला आहे.
स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना मिळालेल्या गुप्त माहितीनुसार काही व्यक्ती एमडी (Mephedrone) या अमली पदार्थाची तस्करी करत असल्याची माहिती मिळाली होती. त्यानुसार एलसीबी व एमआयडीसी पोलीस स्टेशनच्या संयुक्त पथकाने ४ जून रोजी राष्ट्रीय महामार्ग क्रमांक ६ वरील सुरेश दादा जैन कृषी उत्पन्न बाजार समिती परिसरात सापळा रचला.
या कारवाईदरम्यान संशयितांच्या ताब्यातील मारुती सुझुकी एस-क्रॉस कारची झडती घेतली असता त्यांच्याकडून एमडी (मेफेड्रोन) हा अमली पदार्थ आढळून आला. फॉरेन्सिक पथकाच्या प्राथमिक तपासणीत हा पदार्थ एमडी असल्याचे स्पष्ट झाले.
या प्रकरणी पोलिसांनी खालील 3 आरोपींना अटक केली आहे :- रईस हसन देशमुख (वय २७, रा. एमआयडीसी पोलीस कॉलनी, जळगाव), तोसिफ सय्यद आरिफ (वय २१, रा. पिंप्राळा हुडको, जळगाव), कुणाल उर्फ लकी रमेश पाटील (वय ३०, रा. देविदास कॉलनी, जळगाव)
चौकशीदरम्यान आरोपींनी अमली पदार्थ इतर साथीदारांकडून खरेदी केल्याची कबुली दिल्याचे पोलिसांनी सांगितले असून, संबंधित पुरवठादारांचा शोध सुरू आहे.
कारवाईत पोलिसांनी खालील मुद्देमाल जप्त केला :- एमडी (मेफेड्रोन) अमली पदार्थ – ४८,००० रुपये, मारुती सुझुकी एस-क्रॉस कार – ४ लाख रुपये, स्प्लेंडर प्लस मोटारसायकल – ५०,००० रुपये,बजाज पल्सर मोटारसायकल – ७५,००० रुपये, तीन मोबाईल फोन – ८०,००० रुपये = एकूण जप्त मुद्देमाल : ६,५३,००० रुपये
एनडीपीएस कायद्यान्वये गुन्हा
या प्रकरणी एमआयडीसी पोलीस ठाण्यात एनडीपीएस अधिनियम १९८५ अंतर्गत तसेच भारतीय न्याय संहितेतील संबंधित कलमान्वये गुन्हा दाखल करण्यात आला असून पुढील तपास एमआयडीसी पोलीस करीत आहेत.
जळगाव पोलीस दल अमली पदार्थांच्या तस्करीविरोधात कठोर भूमिका घेत असून, नागरिकांनी आपल्या परिसरात संशयास्पद हालचाली दिसल्यास तात्काळ पोलिसांना माहिती द्यावी, असे आवाहन पोलीस अधीक्षक श्रीकांत धिवरे यांनी केले आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गनगणे व प्रॉबेशनरी डीवायएसपी प्रशांत देवकर यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या नेतृत्वाखालील पथकाने यशस्वीरीत्या पार पाडली.
