जळगावात पिस्तूल अन् जिवंत काडतुसांसह एकास ठोकल्या बेड्या!
शनीपेठ पोलिसांची धडक कारवाई : स्मशानभूमीजवळ रचला सापळा; ‘या’ संशयिताचा गेम ओव्हर!
जळगाव : शहरात अवैधरित्या अग्निशस्त्रे बाळगणाऱ्यांविरोधात पोलिसांनी पुन्हा एकदा कडक पाऊल उचलले आहे. शनीपेठ पोलीस ठाण्याच्या पथकाने १० ऑगस्ट रोजी स्मशानभूमीजवळील उमेश बियर शॉपी परिसरात अचानक धाड टाकून सापळा रचला. या कारवाईत एका संशयिताला ताब्यात घेण्यात आले असून, त्याच्याकडून एक देशी बनावटीचे पिस्तूल आणि दोन जिवंत काडतुसे जप्त करण्यात आली आहेत.
प्रकाश तोलार (रा. खेडी, ता. जळगाव, ह.मु. साई सिटी, जळगाव) असे अटक करण्यात आलेल्या आरोपीचे नाव आहे.
अशी झाली ‘गुप्त’ कारवाई…
जिल्ह्यात अवैध शस्त्रांची तस्करी आणि बाळगण्यावर पूर्णपणे आळा घालण्यासाठी पोलीस अधीक्षक श्रीकांत धिवरे यांनी सर्व पोलीस ठाण्यांना विशेष मोहीम राबवण्याचे आदेश दिले आहेत. त्यानुसार शनीपेठ पोलीस ठाण्याचे प्रभारी विशाल जयस्वाल यांच्या मार्गदर्शनाखाली पथक गस्तीवर होते.
दरम्यान, स्मशानभूमी परिसरातील उमेश बियर शॉपीजवळ एक इसम बेकायदेशीर पिस्तूल बाळगून फिरत असल्याची ठोस गोपनीय माहिती पोलिसांना मिळाली. माहितीची खातरजमा होताच पोलीस पथकाने कसलाही सुगावा लागू न देता परिसराला वेढा घातला आणि संशयित प्रकाश तोलार याला जाळ्यात पकडले.
झडती अन् पिस्तूल बाहेर!
पोलिसांनी संशयिताची कसून झडती घेतली असता त्याच्याकडे एक देशी बनावटीचे पिस्तूल आणि दोन जिवंत काडतुसे आढळून आली. पोलिसांनी तत्काळ हा शस्त्रसाठा हस्तगत केला आहे. याप्रकरणी शनीपेठ पोलीस ठाण्यात गुन्हा (रजिस्टर क्र. १७२/२०२६) दाखल करण्यात आला असून, आरोपीवर आर्म्स ॲक्ट आणि महाराष्ट्र पोलीस अधिनियमांतर्गत कायदेशीर कारवाई करण्यात आली आहे.
या पथकाने बजावली कामगिरी
ही कारवाई पोलीस अधीक्षक श्रीकांत धिवरे, अप्पर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनाखाली पीआय विशाल जयस्वाल, पीएसआय संतोष खेडेकर, अभिषेक कटारे, नितीन पाटील, विजय खैरे, योगेश जाधव, महेंद्र पाटील, पराग दुसाने, अमोल वंजारी, निलेश घुगे, गणेश ढाकणे आणि योगेश साबळे यांच्या पथकाने केली.
