जळगावात बसस्थानक परिसरात गुटख्याचा साठा जप्त
राज पान सेंटरवर कारवाई; १ हजार ७९१ रुपयांचा प्रतिबंधित गुटखा जप्त
जळगाव | प्रतिनिधी
जळगाव शहरातील नवीन बसस्थानक परिसरातील राज पान सेंटरवर जिल्हापेठ पोलिसांनी कारवाई करत प्रतिबंधित गुटखा व पानमसाला असा एकूण १ हजार ७९१ रुपयांचा मुद्देमाल जप्त केला. याप्रकरणी अल्ताफ अकबर पटेल (वय २६, रा. मेहरूण आझाद नगर, जळगाव) याच्याविरुद्ध जिल्हापेठ पोलिस ठाण्यात गुन्हा दाखल करण्यात आला आहे.
पोलिसांना मिळालेल्या माहितीनुसार, नवीन बसस्थानक परिसरातील राज पान सेंटरमध्ये मानवी आरोग्यास अपायकारक व शासनाने प्रतिबंधित केलेल्या गुटख्याची विक्री व साठवणूक केली जात असल्याची माहिती मिळाली होती. त्यानुसार पोलिसांनी कारवाई करत दुकानाची तपासणी केली.
या कारवाईत विविध कंपन्यांचा प्रतिबंधित गुटखा, पानमसाला व तंबाखूजन्य पदार्थ आढळून आले. पोलिसांनी पंचांसमक्ष हा मुद्देमाल जप्त केला.
पोलिसांनी केलेल्या कारवाईत सिग्नेचर पान मसाला, रंजनीगंधा पान मसाला, करमचंद पान मसाला, राजश्री पान मसाला, AMD पान मसाला, राजनिवास पान मसाला, विमल पान मसाला, विमल तंबाखू, M गोल्ड तंबाखू तसेच इतर पानमसाला असा एकूण १ हजार ७९१ रुपयांचा मुद्देमाल जप्त करण्यात आला.
या प्रकरणी पोलीस कॉन्स्टेबल १४९५ चंद्रकांत पाटील यांनी दिलेल्या फिर्यादीवरून जिल्हापेठ पोलिस ठाण्यात गुन्हा क्रमांक २५७/२०२६ दाखल करण्यात आला आहे. भारतीय न्याय संहिता २०२३ मधील कलम २२३, २७५ अन्वये गुन्हा नोंदविण्यात आला आहे.
या प्रकरणाचा पुढील तपास पोलीस नाईक राजेश पदमर हे करीत आहेत. संशयित आरोपीस अद्याप अटक करण्यात आलेली नसल्याची माहिती पोलिसांनी दिली आहे.
ही कारवाई जिल्हापेठ पोलिस ठाण्याचे सपोनि अनिल वाघ यांच्या मार्गदर्शनाखाली पोलिस कर्मचाऱ्यांनी केली.
