जळगाव (प्रतिनिधी):- महिलांविषयी आक्षेपार्ह व अश्लील भाषेत सोशल मीडियावर टिप्पणी केल्याप्रकरणी जळगाव शहरातील जिल्हापेठ पोलीस ठाण्यात गुन्हा दाखल करण्यात आला आहे.
याप्रकरणी सौ. नितू महेंद्रसिंग परदेशी (वय ४०, व्यवसाय – भारतीय जनता पक्ष महिला मोर्चा जिल्हाध्यक्ष, रा. गणेश विहार, भवानिमाता मंदिराजवळ, पिंप्राळा रोड, जळगाव) यांनी फिर्याद दिली आहे.
फिर्यादीनुसार, “rohidas adakmol” नावाच्या फेसबुक अकाउंटवरून महिलांच्या विनयशीलतेचा अपमान होईल, सामाजिक शांतता भंग होईल तसेच महिलांविषयी अश्लील भाषेत कमेंट करण्यात आल्याचा आरोप करण्यात आला आहे. तसेच समाजात राजकीय पक्षाची प्रतिमा मलीन करण्याचा प्रयत्न केल्याचेही फिर्यादीत नमूद करण्यात आले आहे.
ही घटना ५ मे २०२६ रोजी सकाळी १० वाजेच्या सुमारास समोर आली. याप्रकरणी ६ मे रोजी सायंकाळी जिल्हापेठ पोलीस ठाण्यात भारतीय न्याय संहिता कलम २९४, ७९ आणि ३५६ अन्वये गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक संजय भांडारकर करीत आहेत.
