नराधम नऊ तासांत गजाआड; पोक्सो अंतर्गत गुन्हा दाखल
अमळनेर (प्रतिनिधी): अमळनेर शहरातील एका भागात १२ वर्षीय अल्पवयीन बालिकेचे तोंड दाबून तिच्यावर अत्याचार करण्याचा प्रयत्न केल्याची अत्यंत संतापजनक आणि घृणास्पद घटना उघडकीस आली आहे. घरात कोणी नसताना घरात घुसून नराधमाने बालिकेचा विनयभंग केला. मात्र, बालिकेच्या आजीने ऐनवेळी घराचा दरवाजा उघडल्याने पुढील अनर्थ टळला. या खळबळजनक घटनेनंतर अमळनेर पोलिसांनी तात्काळ तपासाची चक्रे फिरवून अवघ्या नऊ तासांच्या आत नराधम आरोपीला बेड्या ठोकल्या आहेत.
प्राप्त माहितीनुसार, १२ वर्षे ९ महिने वयाची पीडित बालिका रविवार, २४ मे २०२६ रोजी रात्री तिच्या आजीसोबत जेवण करून एकाच खाटेवर झोपली होती. सोमवार, २५ मे २०२६ रोजी सकाळी ६:०० वाजेच्या सुमारास आजी काही कामानिमित्त घराबाहेर पडली होती आणि घराचा दरवाजा बंद होता. याच संधीचा फायदा घेऊन परिसरातच राहणारा संशयित आरोपी शिळ्या उर्फ साहिल शेख (रा. अमळनेर) हा बेकायदेशीरपणे घरात घुसला. तो पीडित बालिकेच्या खाटेवर झोपला आणि तिच्या शरीराला अयोग्य स्पर्श करू लागला. अचानक अंगावरून हात फिरत असल्याचे जाणवताच बालिकेला जाग आली.
समोर शिळ्या उर्फ साहिल याला पाहून बालिकेने भीतीने जोरात ओरडण्याचा प्रयत्न केला. मात्र, नराधम साहिलने तात्काळ तिचे तोंड हाताने दाबून धरले. त्याने बालिकेचे कपडे काढून तिच्यावर जबरदस्ती करण्याचा प्रयत्न केला. नेमक्या याच वेळी बालिकेची आजी बाहेरून आली आणि तिने घराचा दरवाजा उघडला. आजीला समोर पाहताच नराधम साहिल बालिकेच्या अंगावरून उठून पळून जाऊ लागला. आजीने त्याला जागीच पकडून “माझ्या घरात काय करत होतास?” असे विचारत त्याला चापट मारली. मात्र, नराधमाने आजीला जोराचा धक्का देऊन तिथून पळ काढला. या धसक्यातून सावरल्यानंतर आजीने विचारपूस केली असता पीडितेने घडलेला सर्व प्रकार रडत-रडत सांगितला. त्यानंतर नातेवाईकांना बोलावून कुटुंबाने थेट अमळनेर पोलीस ठाणे गाठले.
पीडित बालिकेने दिलेल्या फिर्यादीवरून अमळनेर पोलीस ठाण्यात गुन्हा रजि. नं. २५९/२०२६ अन्वये भारतीय न्याय संहिता (BNS) २०२३ चे कलम ७४, ७५, ७६, ३३३ आणि बालकांचे लैंगिक अपराधांपासून संरक्षण अधिनियम (पोक्सो कायदा) २०१२ चे कलम ८ व १२ प्रमाणे गंभीर गुन्हा दाखल करण्यात आला.
गुन्हा दाखल झाल्यानंतर अवघ्या काही तासांतच म्हणजेच २५ मे २०२६ रोजी रात्री संशयित नराधम आरोपी शिळ्या उर्फ साहिल रफिक शेख याला शिताफीने अटक केली. या प्रकरणाचा पुढील तपास पोलीस उपनिरीक्षक समाधान गायकवाड करत आहेत.
