भुसावळ येथे रेल्वेतील भिक्षुकीच्या वादातून किन्नरावर चाकूने प्राणघातक हल्ला; चौघांवर बाजारपेठ पोलिसांत गुन्हा दाखल
भुसावळ (विशेष प्रतिनिधी): रेल्वेगाड्यांमध्ये भिक्षुकी (मागणी) करण्याच्या वादातून एका २४ वर्षीय किन्नरावर चाकूने वार करून गंभीर दुखापत केल्याची धक्कादायक घटना भुसावळ शहरात घडली आहे. शहरातील मुस्लिम कॉलनीतील बडी खानका मागे ९ ऑगस्ट २०२६ रोजी रात्री १०:०० वाजेच्या सुमारास हा प्रकार घडला. या प्रकरणी १० ऑगस्ट रोजी भुसावळ बाजारपेठ पोलीस ठाण्यात चार जणांविरुद्ध गुन्हा दाखल करण्यात आला आहे.
नेमका काय घडला प्रकार?
तक्रारदार मुस्कान अतुल पांडे उर्फ दीपक वंशकार (वय २४, व्यवसाय- भिक्षुकी/किन्नर, रा. प्लॉट क्र. १२, मुस्लिम कॉलनी, बडी खानका मागे, भुसावळ) हे रेल्वेगाड्यांमध्ये भिक्षुकीचे काम करतात. संशयित आरोपी बाबा काल्या याने मुस्कान यांना “तू आमच्या रेल्वेमध्ये काम करायला जा” असे सांगितले. मात्र, मुस्कान यांनी त्याला स्पष्ट नकार दिला.
याच नकाराचा राग धरून संशयित आरोपी बाबा काल्या, अरशद आणि इतर दोन अनोळखी इसमांनी मुस्कान व त्यांच्या मैत्रिणीला गाठून अश्लील शिवीगाळ करत चापटबुक्क्यांनी बेदम मारहाण केली, तसेच जीवे मारण्याची धमकी दिली. या वादादरम्यान आरोपी अरशद याने हातातील धारदार चाकूने मुस्कान यांच्या डाव्या गालावर वार करून त्यांना गंभीर जखमी केले.
चौघांविरुद्ध गुन्हा दाखल
या घटनेनंतर पीडित मुस्कान यांनी दिलेल्या तक्रारीवरून भुसावळ बाजारपेठ पोलीस ठाण्यात आरोपी अरशद, बाबा काल्या आणि इतर दोन अनोळखी इसमांविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(२), ३५१(३) आणि ३(५) अन्वये (गुन्हा रजि. क्र. ३६९/२०२६) गुन्हा दाखल करण्यात आला आहे.
पोलीस निरीक्षक राहुल टी. वाघ आणि सहाय्यक पोलीस निरीक्षक राहुल तावडे यांच्या मार्गदर्शनाखाली पोलीस हेड कॉन्स्टेबल जुबेर सिराज तडवी या प्रकरणाचा पुढील सखोल तपास करत आहेत.
