ट्रॅक्टर-दुचाकीच्या भीषण धडकेत तरुण ठार; दोन गंभीर जखमी
जामनेर | प्रतिनिधी
जामनेर तालुक्यातील फतेहपूरजवळ चिंचोली-शेवगेपिंप्री रस्त्यावर ट्रॅक्टर आणि दुचाकीची समोरासमोर धडक होऊन झालेल्या भीषण अपघातात २२ वर्षीय तरुणाचा मृत्यू, तर दोघे गंभीर जखमी झाल्याची घटना १८ ऑगस्ट रोजी सायंकाळच्या सुमारास घडली.
मिळालेल्या माहितीनुसार, शेवगेपिंप्रीकडून चिंचोलीच्या दिशेने येणारा स्वराज कंपनीचा ट्रॅक्टर (एमएच १९, ईपी ७५६६) आणि चिंचोलीकडून शेवगेपिंप्रीकडे जाणारी दुचाकी (एमएच १९, एएम ६६९९) यांच्यात चिंचोली-शेवगेपिंप्री रस्त्यावर समोरासमोर जोरदार धडक झाली.या अपघातात दुचाकीस्वार रमजान भिकन तडवी (वय २२, रा. शेवगेपिंप्री) याचा गंभीर दुखापतीमुळे मृत्यू झाला.
अपघातात समीर अलाऊद्दीन तडवी (वय २२) आणि रहेमान गफूर तडवी (वय २५), दोघेही रा. शेवगेपिंप्री, हे गंभीर जखमी झाले आहेत. त्यांच्यावर रुग्णालयात उपचार सुरू आहेत.दरम्यान, मयत रमजान तडवी यांच्या मृतदेहाचे जळगाव येथील सामान्य रुग्णालयात शवविच्छेदन करण्यात आले. त्यानंतर मृतदेह नातेवाईकांच्या ताब्यात देण्यात आला.या अपघाताचा पुढील तपास सहाय्यक पोलीस निरीक्षक अंकुश जाधव यांच्या मार्गदर्शनाखाली पोलीस कर्मचारी करीत आहेत.
