मोबाईल रिपेअरिंग दुकान फोडून रोकडसह तीन मोबाईल लंपास
भुसावळ शहरातील घटना
भुसावळ | प्रतिनिधी
भुसावळ शहरातील उदासी कॉम्प्लेक्स परिसरातील एका मोबाईल रिपेअरिंग दुकानाचे कुलूप तोडून चोरट्यांनी रोकड आणि तीन मोबाईल असा एकूण १९ हजार रुपयांचा मुद्देमाल लंपास केल्याची घटना उघडकीस आली आहे. याप्रकरणी बाजारपेठ पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, शिवधाम मंदिराजवळ राहणारे गणेश प्रदीप विसे (वय ३६) यांच्या मालकीचे मोबाईल रिपेअरिंगचे दुकान उदासी कॉम्प्लेक्समधील बेंडें हॉटेलजवळ आहे. १८ ऑगस्ट रोजी सायंकाळी साडेपाच वाजेपासून १९ ऑगस्ट रोजी सकाळी ११ वाजेच्या दरम्यान अज्ञात चोरट्याने दुकानाचे कुलूप तोडून आत प्रवेश केला.
चोरट्याने दुकानातील लॉकरमध्ये ठेवलेली ३ हजार रुपयांची रोकड तसेच विवो कंपनीचा ५ हजार रुपये किमतीचा मोबाईल, एमआय कंपनीचा ५ हजार रुपये किमतीचा मोबाईल आणि रिअलमी कंपनीचा ६ हजार रुपये किमतीचा मोबाईल असा एकूण १९ हजार रुपयांचा मुद्देमाल चोरून नेला.
घटना लक्षात आल्यानंतर दुकानमालकाने बाजारपेठ पोलिसांना माहिती देत तक्रार दाखल केली. तक्रारीवरून अज्ञात चोरट्याविरुद्ध भारतीय न्याय संहितेच्या कलम ३०३(२) आणि ३३१(४) नुसार गुन्हा दाखल करण्यात आला आहे.पोलीस हेड कॉन्स्टेबल भूषण चौधरी पुढील तपास करीत आहेत
