रायपूर: छत्तीसगडच्या नक्षलग्रस्त सुकमा जिल्ह्यात नक्षलवाद्यांशी झालेल्या चकमकीत सुरक्षा दलाचे १७ जवान शहीद झाले आहेत. त्यांचे मृतदेह ताब्यात घेण्यात आले आहेत. छत्तीसगड पोलिसांनी ही माहिती दिली आहे. छत्तीसगडमधील नक्षलग्रस्त बस्तर भागातील चिंतागुफा पोलिस ठाणे क्षेत्रात शनिवारी सुरक्षा दलाचे जवान आणि नक्षलवाद्यांमध्ये ही चकमक झाली. यात अनेक नक्षलवादी ठार झाले आहेत.
चकमकीनंतर बेपत्ता झाले १७ जवान
या बाबत मिळालेल्या माहितीनुसार, कोजारगुडाच्या डोंगरभागात झालेल्या या चकमकीदरम्यान सुरक्षा दलाचे १४ जवान जखमी झाले होते. तर, या दरम्यान अनेक नक्षलवादी ठार झाल्याचा दावा पोलिसांनी केला.
पोलिस अधिकाऱ्यांनी दिलेल्या माहितीनुसार, या चकमकीनंतर सुरक्षा दलाचे १७ जवान बेपत्ता होते. या बेपत्ता झालेल्या जवानांच्या शोधासाठी मोठ्या संख्यने पथके जंगलांमध्ये रवाना झाली.
रविवारी सकाळी शोध पथकांच्या मदतीसाठी सुरक्षा दलाच्या जवानांनाही पाठवण्यात आले. शेवटी या शोध मोहिमेत सुरक्षा दलाच्या १७ जवानांचे मृतदेह सापडले.
शिवराज चौहान यांनी वाहिली श्रद्धांजली
नक्षलवाद्यांशी झालेल्या चकमकीत शहीद झालेल्या जवानांना भाजप नेते आणि माजी मुख्यमंत्री शिवराजसिंह चौहान यांनी श्रद्धांजली वाहिली आहे. चौहान यांनी ट्विट करत म्हटले की, ‘सुकमा येथे नक्षलवाद्यांच्या हल्ल्यात अनेक वीर सुपुत्र शहीद झाल्याचे वृत्त ऐकून मी अतिशय दु:खी झालो आहे. दिवंगत आत्म्यांना शांती लाभावी आणि त्यांच्या कुटुंबीयांना हा वज्राघात सहन करण्याची सहनशक्ती मिळावी यासाठी मी ईश्वराकडे प्रार्थना करत आहे. विनम्र श्रद्धांजली! देश आपल्या सुपुत्रांचे बलिदान विसरणार नाही, या निर्दयींना धडा शिकवणार.’
सुकमा जिल्ह्यातील चिंतागुफा पोलिस ठाणे क्षेत्रात झाली चकमक
छत्तीसगड पोलिस दलातील एका अधिकाऱ्याने दिलेल्या माहितीनुसार, सुकमा जिल्ह्यातील एलमागुडा येथे नक्षलवादी असल्याची माहिती मिळाल्यानंतर चिंतागुफा, बुरकपाल आणि तिमेलवाडा येथून डीआरजी, एसटीएफ आणि सीआरपीएफच्या कोब्रा बटालियते सहाशे जवान त्या भागात रवाना करण्यात आले. सुरक्षा दलाचे जवान राजगुडा गावातील डोंगरांवर असताना दुपारी सुमारे अडीच वाजण्याच्या सुमाराला नक्षलवाद्यांनी जवानांवर गोळीबार सुरू केला असे पोलिस अधिकाऱ्यांनी सांगितले. यानंतर जवानांनीही प्रत्युत्तरादाखल जवानांनीही नक्षलवाद्यांच्या दिशेने गोळीबार सुरू केला.
