पाचोरा तालुक्यातील जोगी तांडा येथील घटना
पाचोरा (प्रतिनिधी) : तालुक्यातील जोगे तांडा येथे ट्रॅक्टरच्या ट्राॅलीखाली सापडुन ५ वर्षीय बालिकेचा दुर्दैवी मृत्यू झाल्याची धक्कादायक घटना शुक्रवारी दि. २९ मार्च रोजी रात्री घडली आहे. याप्रकरणी पिंपळगाव हरेश्वर पोलीस स्टेशन येथे अकस्मात मृत्यूची नोंद करण्यात आली असून गुन्हा दाखल करण्याचे काम सुरु होते.
पुजा सुनील चव्हाण (वय – ५ वर्ष) असे मयत बालिकेचे नाव आहे. तिचे वडील सुनील संतोष चव्हाण हे मोलमजुरी करून कुटुंबाचा उदरनिर्वाह करतात. त्यांना पत्नी, ३ मुली असा परिवार आहे. त्यातील पूजा हि गावात जोगे तांडा येथे खेळत असतांना समोरुन एक ट्रॅक्टरच्या ट्राॅलीच्या मागील चाकाखाली आल्याने हिचा जागीच दुर्दैवी मृत्यू झाला. पुजा हिस पाचोरा ग्रामीण रुग्णालयात नेले असता तेथे डॉक्टरांनी तपासून तिला मृत घोषित केले. यावेळी कुटुंबीयांनी एकच आक्रोश केला. घटनेप्रकरणी पिंपळगाव हरेश्वर पोलीस स्टेशन येथे अकस्मात मृत्यूची नोंद करण्यात आली आहे. दरम्यान, संध्याकाळी गुन्हा दाखल करण्याचे काम सुरु असल्याची माहिती मिळाली आहे. घटनास्थळी एपीआय प्रकाश काळे व सहकार्यांनी जाऊन पाहणी केली.
