जळगाव तालुक्यातील शिरसोली येथील घटना
जळगाव (प्रतिनिधी) : तालुक्यातील शिरसोली प्र.न.येथील दोन गटांमध्ये जुन्या वादातून हाणामारी झाली. त्यात धारदार हत्याराचा वापर झाल्याने तीन तरुण जखमी झाले. या प्रकरणी एमआयडीसी पोलीस स्टेशनला परस्परविरोधी गुन्हे दाखल करण्यात आले आहेत. जखमींवर शासकीय रुग्णालयात उपचार सुरू आहेत.
हेमंत मुरलीधर बारी (वय १७, रा. शिरसोली प्र.न.) याने दिलेल्या तक्रारीत म्हटले आहे की, शुक्रवार दि.२८ जुलै रोजी हेमंत, त्याचा मित्र मयुरेश रवींद्र महाजन (वय १७), सचिन चौधरी हे बस स्टॉपवरील पान टपरीजवळ उभे होते. काही वेळाने वैभव मोहन बारी (वय २२), विवेक मोहन बारी (वय १९) मयूर बारी, सौरव सोनवणे (सर्व रा.शिरसोलीप्र.न.) असे त्या ठिकाणी आले. काही दिवसापूर्वी तू मागे मला शिवीगाळ का गेली असा जाब विचारून हेमंत आणि मयुरेश यांना आणि सचिनला मारहाण करू लागले.
त्याचा जाब विचारला असता विवेक बारी याने त्याचे जवळ असलेल्या धारदार हत्याराने हेमंत बारीच्या कमरेखाली डाव्या बाजूस दुखापत केली तर मयुरेशच्या पोटात वैभव बारी याने त्याचे जवळ असलेल्या हत्याराने मारून गंभीर दुखापत केली. तिघांनाही ठार मारण्याची धमकी देऊन ते निघून गेले. जखमींना त्यांच्या कुटुंबीयांनी शासकीय रुग्णालयात उपचारासाठी दाखल केले होते.
तर दुसऱ्या तक्रारीत वैभव मोहन बारी (वय २२ रा. शिरसोलीप्र.न.) याने म्हटले आहे की, शुक्रवारी २८ जुलै रोजी रात्री साडेदहा वाजता त्याचा भाऊ विवेक बारी याला बस स्टॉप जवळ कोणीतरी मारत आहे अशी माहिती मिळाल्यावरून वैभव बारी तेथे गेला. तर विवेक बारी याला कुणाल बारी, हेमंत बारी, मयूर महाजन, भोला बारी हे मारहाण करत होते. त्याचा जाब विचारला असता हेमंतला राग आल्याने त्याने वैभवच्या उजव्या डोळ्यावर काहीतरी धारदार हत्याराने मारून दुखापत केली.
माझ्या भावाला कुणाल बारी, भोला, मयूर यांनी लाथा बुक्क्यांनी मारहाण करून मला व माझ्या भावाला जिवंत सोडणार नाही अशी धमकी दिली. गर्दी जमा झाल्याने सदर संशयित पळून गेले. नागरिकांनी आम्हाला शासकीय रुग्णालयात उपचारासाठी दाखल केले, असे तक्रारीत म्हटले आहे. दरम्यान एमआयडीसी पोलीस स्टेशनला परस्परविरोधी गुन्हे दाखल करण्यात आले आहे.
पुढील तपास एमआयडीसी पोलिस स्टेशनचे पो.नि. जयपाल हिरे यांच्या मार्गदर्शनाखाली पो.ना.जितेंद्र राठोड, समाधान पाटील, ढवळे हे करीत आहे.
