जळगाव (प्रतिनिधी ) – शहरातील पिंप्राळा हुडको येथे जुन्या भांडणातून तरूणासह त्यांच्या मुलाला दोन जणांनी दगडासह फरशीने मारहाण करुन दुखापत केली. रामानंदनगर पोलिसात गुन्हा दाखल झाला आहे.
तालुक्यातील आसोदा येथील मूळ रहिवासी अंकुश धनराज साळवे (वय ४० ) हे उधना येथे वास्तव्यास आहेत. रविवारी ते त्यांचा मुलगा विक्कीसह पिंप्राळा हुडको येथील सिध्दार्थ नगरात आले होते. यावेळी जुन्या भांडणाच्या कारणावरुन राजेंद्र दिलीप शिरसाठ (रा. मुसळी ता. धरणगाव ) व राहूल युवराज सोनवणे (रा. सिध्दार्थ नगर, जळगाव ) या दोघांनी अंकुश साळवे यांच्यासह मुलगा विक्की यास शिवीगाळ करत चापटा बुक्क्यांनी मारहाण केली. फरशी व दगडाने अंकुश साळवे यांच्यासह मुलगा विक्कीच्या डोक्यात मारहाण करुन दुखापत केली. यात दोन्हीही जखमी झाले सोमवारी अंकुश साळवे यांनी दिलेल्या तक्रारीवरुन राजेंद्र शिरसाठ व राहूल सोनवणे या दोघांविरोधात रामानंदनगर पोलिसात गुन्हा दाखल करण्यात आला आहे. पुढील तपास पो ना ज्ञानेश्वर पाटील हे करीत आहेत.
