सोन्या-चांदीच्या दागिन्यांसह २० हजारांची रोकड चोरी; कृषी उत्पन्न बाजार समितीमागील घराला चोरट्यांचे लक्ष्य
मुक्ताईनगर (प्रतिनिधी) :- मुक्ताईनगर शहरातील कृषी उत्पन्न बाजार समितीच्या मागील भागातील बंद घराचे कुलूप व कडीकोयंडा तोडून अज्ञात चोरट्यांनी घरात प्रवेश केला. घरातील कपाटातून सोन्या-चांदीचे दागिने तसेच रोकड असा एकूण २ लाख ५६ हजार ९५० रुपये किमतीचा ऐवज लंपास केल्याची घटना समोर आली आहे. याप्रकरणी मुक्ताईनगर पोलिस ठाण्यात अज्ञात चोरट्यांविरुद्ध घरफोडीचा गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी रामधन केशव सूर्यवंशी (वय ६१, सेवानिवृत्त बीएसएफ कर्मचारी, रा. कृषी उत्पन्न बाजार समितीमागे, मुक्ताईनगर, जि. जळगाव) यांच्या बंद घराला चोरट्यांनी लक्ष्य केले.
८ सप्टेंबर २०२६ रोजी दुपारी २ वाजेपासून १६ सप्टेंबर रोजी दुपारी ३ वाजेपर्यंतच्या कालावधीत अज्ञात चोरट्यांनी घराचे कुलूप व कडीकोयंडा तोडून घरात प्रवेश केला. त्यानंतर घरातील कपाटात ठेवलेले सोन्या-चांदीचे दागिने आणि रोकड चोरून नेली.
चोरीस गेलेल्या ऐवजामध्ये सोन्याच्या अंगठ्या, बदामी आकाराच्या अंगठ्या, मंगळसूत्र, सोन्याचे कारले, सोन्याचे गहू मणी, सोन्याची चैन, पिवळ्या रंगाचे लॉकेट तसेच चांदीची पैंजण व जोडवे यांचा समावेश आहे. याशिवाय २० हजार रुपये रोकड चोरीला गेली आहे.
पोलिस कागदपत्रानुसार, चोरीस गेलेल्या दागिन्यांची व रोकडची एकूण किंमत २ लाख ५६ हजार ९५० रुपये इतकी आहे.
घटना लक्षात आल्यानंतर रामधन सूर्यवंशी यांनी मुक्ताईनगर पोलिस ठाण्यात फिर्याद दिली. त्यावरून गुन्हा रजिस्टर क्रमांक ३५७/२०२६, भारतीय न्याय संहिता कलम ३०५(अ), ३३१(३), ३३१(४) अन्वये गुन्हा दाखल करण्यात आला आहे.
या प्रकरणाचा पुढील तपास सपोनि जयेश पाटील करीत आहेत. अज्ञात चोरट्यांचा शोध सुरू असून, अद्याप कोणालाही अटक करण्यात आलेली नाही.
