पारोळा तालुक्यातील पळासखेडे बु. येथिल घटना
पारोळा (प्रतिनिधी) – : पारोळा तालुक्यातील पळासखेडे बु. येथे मागील भांडणाच्या कारणावरून दोन मित्रांमध्ये झालेल्या वादातून एकाने दुसऱ्याच्या पोटात चाकू खुपसल्याची घटना गुरुवारी (दि. १०) दुपारी घडली. या हल्ल्यात मयूर दुर्वास पाटील याचा मृत्यू झाला. याप्रकरणी पारोळा पोलीस ठाण्यात अंकुश नेहरू पाटील (रा. पळासखेडे बु., ता. पारोळा) याच्याविरुद्ध खुनाचा गुन्हा दाखल करण्यात आला असून आरोपीचा शोध सुरू आहे.
पोलिसांनी दिलेल्या माहितीनुसार, दि. १० सप्टेंबर रोजी दुपारी ३ ते ४ वाजेच्या सुमारास पळासखेडे बु. शिवारातील रवींद्र सुकदेव पाटील यांच्या शेताजवळ ही घटना घडली. मागील भांडणाच्या कारणावरून आरोपी अंकुश पाटील याचा मयूर पाटील याच्याशी वाद झाला. यावेळी अंकुश याने त्याच्या पँटच्या डाव्या खिशातून चाकू काढून मयूरच्या पोटात खुपसल्याचे फिर्यादीत नमूद करण्यात आले आहे. गंभीर जखमी झालेल्या मयूरचा उपचार दरम्यान मृत्यू झाला.
या घटनेप्रकरणी मयूरचे वडील बाळू उर्फ दुर्वास भिका पाटील (वय ४५, व्यवसाय शेती, रा. पळासखेडे बु.) यांच्या फिर्यादीवरून पारोळा पोलीस ठाण्यात गुन्हा रजिस्टर क्रमांक ३४१/२०२६ नुसार भारतीय न्याय संहिता कलम १०३(१), ११५(२), ३५२, ३५१(२) अन्वये गुन्हा दाखल करण्यात आला आहे.
या प्रकरणाचा तपास सहाय्यक पोलीस निरीक्षक योगेश महाजन करीत असून आरोपी अंकुश नेहरू पाटील याचा शोध घेण्यासाठी पोलिसांकडून प्रयत्न सुरू आहेत. घटनेनंतर परिसरात शांतता असून पोलिसांनी परिस्थितीवर लक्ष ठेवले आहे.
