सावदा फाट्याजवळ कंट कंपनीच्या मोटार ग्रेडरची दुचाकीला धडक; चालकाविरुद्ध भडगाव पोलिसांत गुन्हा दाखल
भडगाव, ( प्रतिनिधी) : कजगाव-पारोळा रस्त्यावर सावदा फाट्याजवळ झालेल्या भीषण अपघातात ४३ वर्षीय प्रविण देविदास पाटील (रा. घुसर्डी, ता. भडगाव, जि. जळगाव) यांचा मृत्यू झाला. रस्त्याचे समतलीकरणाचे काम सुरू असताना कंट कंपनीच्या मोटार ग्रेडरने निष्काळजीपणे वाहतूक सुरू असलेल्या मार्गाकडे दुर्लक्ष करून दुचाकीला धडक दिल्याने हा अपघात झाल्याचे फिर्यादीत नमूद करण्यात आले आहे.
पोलिसांनी दिलेल्या माहितीनुसार, ९ सप्टेंबर २०२६ रोजी दुपारी सुमारे १.३० वाजता प्रविण देविदास पाटील हे आपल्या मुलीला कोंळगाव येथील शाळेत सोडून परत येत होते. त्यावेळी कजगाव-पारोळा रोडवरील सावदा फाट्याजवळ सार्वजनिक ठिकाणी रस्ता समतलीकरणाचे काम सुरू होते.
यावेळी कंट कंपनीचे मोटार ग्रेडर (रस्ता समतलीकरण यंत्र) क्रमांक एमएच-१८ सीई-५३०३ हे रस्त्यावर काम करीत होते. सदर वाहनाचा चालक माहिती नसताना त्याने रस्त्याच्या परिस्थितीकडे दुर्लक्ष करून काम सुरू ठेवले. त्याचवेळी वाहतूक सुरू असताना या यंत्राच्या ताब्यातील लोखंडी भागाची धडक प्रविण पाटील यांच्या ताब्यातील बजाज कंपनीची प्लॅटिना मोटारसायकल क्रमांक एमएच-१९ डीडी-३३०२ हिला बसली. या धडकेत प्रविण पाटील हे गंभीर जखमी झाले.
अपघातानंतर त्यांना उपचारासाठी नेण्यात आले; मात्र गंभीर दुखापतीमुळे त्यांचा मृत्यू झाला. या घटनेमुळे परिसरात हळहळ व्यक्त करण्यात येत आहे.
वाहन चालकाविरुद्ध गुन्हा
या प्रकरणी फिर्यादीच्या तक्रारीवरून भडगाव पोलिस ठाण्यात गुन्हा रजिस्टर क्रमांक २७७/२०२६ दाखल करण्यात आला आहे. आरोपी चालकाविरुद्ध भारतीय न्याय संहिता २०२३ मधील कलम १०६(१), १२५(अ), १२५(ब) तसेच मोटार वाहन अधिनियमातील कलम १३४(ब) व १७७ अन्वये गुन्हा नोंदविण्यात आला आहे.
पोलिस नोंदीनुसार, अपघातास कारणीभूत ठरलेल्या मोटार ग्रेडरच्या चालकाचे नाव अद्याप समोर आलेले नाही. आरोपीला अटक झालेली नसून पोलिसांकडून त्याचा शोध सुरू आहे.
या प्रकरणाचा पुढील तपास स.फौ. २७२७ अनिल रामचंद्र अहिरे, भडगाव पोलिस ठाणे, करीत आहेत.
