भाविकांच्या वाहनाला स्विफ्ट कारची जोरदार धडक; १२ जखमी
पाचोरा-भडगाव मार्गावरील आंबेवडगावजवळ अपघात; सहा जण गंभीर
पाचोरा : देवदर्शन करून परतणाऱ्या भाविकांच्या बोलेरो पिकअप वाहनाला स्विफ्ट कारने जोरदार धडक दिल्याची घटना दि. ११ ऑगस्ट रोजी रात्री साडेअकराच्या सुमारास पाचोरा-भडगाव मार्गावर घडली. या अपघातात बोलेरोमधील एकूण १२ भाविक जखमी झाले असून, त्यापैकी सहा जण गंभीर जखमी असल्याची माहिती आहे. अन्य सहा जणांना किरकोळ दुखापत झाली.
देवदर्शनावरून परतताना अपघात
पाचोरा तालुक्यातील आंबेवडगाव येथील बंजारा समाजातील भाविक सिन्नर तालुक्यातील वडांगडी येथे देवदर्शनासाठी गेले होते. दर्शन आटोपून ते बोलेरो पिकअपमधून परतत असताना पाचोरा-भडगाव मार्गावर त्यांच्या वाहनाला पाचोराकडून येणाऱ्या स्विफ्ट कारने जोरदार धडक दिली.
सहा जण गंभीर जखमी
अपघातात संजय पवार (५०), अविनाश पवार (२४), सुनील राठोड (२७), सुपडुबाई ईश्वर पवार (४०), उज्ज्वलाबाई सुनील राठोड (२२) आणि मिराबाई सरिचंद राठोड (६०) हे गंभीर जखमी झाले. वाहनातील अन्य सहा भाविकांनाही दुखापत झाली.
प्रथम भडगावात उपचार
अपघातानंतर जखमींना तातडीने भडगाव येथील प्राथमिक आरोग्य केंद्रात दाखल करण्यात आले. तेथे डॉ. पंकज जाधव यांनी जखमींवर प्रथमोपचार केले. त्यानंतर पुढील उपचारासाठी सर्व जखमींना पाचोरा येथील विघ्नहर्ता हॉस्पिटलमध्ये हलविण्यात आले.
विघ्नहर्ता हॉस्पिटलमध्ये डॉ. सागर गरुड यांनी जखमींवर उपचार केले. दरम्यान, काँग्रेस तालुकाध्यक्ष सचिन सोमवंशी यांनी रुग्णालयात भेट देऊन जखमींची विचारपूस केली तसेच त्यांच्या प्रकृतीची माहिती घेतली.
अपघातातील सर्व जखमींवर उपचार सुरू असून, अपघात नेमका कशामुळे झाला याबाबत पुढील तपास सुरू आहे.
