जळगाव शहरातील चैतन्य नगरात दिवसाढवळ्या घरफोडी
१.६२ लाखांचे दागिने व रोख रक्कम लांबवली
जळगाव: शहरातील चैतन्य नगर भागात भरदिवसा बंद घर फोडून अज्ञात चोरट्याने १ लाख ६२ हजार रुपये किमतीचे सोन्याचे दागिने आणि रोख रक्कम लांबवल्याची घटना समोर आली आहे. या प्रकरणी जिल्हापेठ पोलीस ठाण्यात अज्ञात आरोपीविरुद्ध घरफोडीचा गुन्हा नोंदवण्यात आला आहे.
पोलीस सूत्रांकडून मिळालेल्या सविस्तर माहितीनुसार, चैतन्य नगर येथील रहिवासी आणि व्यावसायिक कंत्राटदार धनराज उत्तम गोपाळ (वय ४३, रा. फ्लॅट नं. २, ओम चेंबर को-ऑप सोसायटी, चैतन्य नगर, जळगाव) हे २९ जुलै २०२६ रोजी दुपारी चार वाजेच्या सुमारास त्यांच्या पत्नी कविता यांच्यासह घराला कडी-कुलूप लावून मायादेवी नगर येथे कामानिमित्त गेले होते.
दुपारी चार ते पाच वाजेच्या दरम्यान, अवघ्या एका तासाच्या कालावधीत अज्ञात चोरट्याने त्यांच्या बंद घराच्या दरवाजाचा कडी-कोयंडा तोडून आत प्रवेश केला. घरातील टीव्ही काउंटरच्या ड्रॉवरमध्ये ठेवलेली १ लाख ५२ हजार रुपयांची रोख रक्कम आणि १० हजार रुपये किमतीचे ३ ग्रॅम वजनाचे सोन्याचे मंगळसूत्र असा एकूण १ लाख ६२ हजार रुपयांचा मुद्देमाल चोराने लांबवला. रोख रक्कमेत ५00 रुपयांच्या १६६ नोटा (८३ हजार रु.), २०० रुपयांच्या २२० नोटा (४४ हजार रु.) आणि १०० रुपयांच्या २५० नोटा (२५ हजार रु.) यांचा समावेश होता.
धनराज गोपाळ हे घरी परतल्यानंतर त्यांना चोरीचा हा प्रकार लक्षात आला. त्यांनी तात्काळ जिल्हापेठ पोलीस ठाण्यात धाव घेऊन तक्रार दाखल केली. ३० जुलै २०२६ रोजी मध्यरात्री १२.१२ वाजता त्यांच्या फिर्यादीवरून भारतीय न्याय संहिता (BNS) २०२३ मधील कलम ३०५(अ) आणि ३३१ अन्वये गुन्हा नोंदवण्यात आला. पुढील तपास पोलीस उपनिरीक्षक गोपाळ देशमुख करत आहे.
