चोपडा शहरात घरफोडी; दोन लाखांचे दागिने लंपास
अज्ञातांविरुद्ध गुन्हा दाखल
चोपडा | प्रतिनिधी
चोपडा शहरातील आदर्श नगर परिसरात अज्ञात चोरट्यांनी बंद घराचे कुलूप तोडून घरफोडी करत तब्बल १ लाख ८४ हजार ५०० रुपयांचे सोन्याचे दागिने लंपास केल्याची घटना उघडकीस आली आहे. या प्रकरणी चोपडा शहर पोलीस ठाण्यात अज्ञात चोरट्यांविरुद्ध गुन्हा दाखल करण्यात आला असून पोलिसांनी तपास सुरू केला आहे.
फिर्यादी बिरजू ओंकार सूर्यवंशी (वय ३२, रा. आदर्श नगर, चोपडा) यांनी दिलेल्या फिर्यादीनुसार, २१ जुलै रोजी सकाळी ८.३० ते ३० जुलै रोजी दुपारी ३.३० या कालावधीत त्यांच्या घरात कोणी नसल्याची संधी साधून अज्ञात चोरट्यांनी घराचे कुलूप व कडी-कोयंडा तोडून प्रवेश केला. त्यानंतर बेडरूममधील कपाटातून सोन्याचे दागिने चोरून नेले.
चोरीस गेलेल्या ऐवजामध्ये सुमारे ३ ग्रॅम वजनाचे मंगळसूत्र (१३,५०० रुपये), २० ग्रॅम वजनाचे सोन्याचे मंगळसूत्र व पोत (९०,००० रुपये), १४ ग्रॅम वजनाचे कानातील दागिने (६३,००० रुपये) तसेच ४ ग्रॅम वजनाची सोन्याची अंगठी (१८,००० रुपये) असा एकूण १ लाख ८४ हजार ५०० रुपयांचा ऐवज असल्याचे फिर्यादीत नमूद करण्यात आले आहे.
या प्रकरणी चोपडा शहर पोलीस ठाण्यात गुन्हा क्रमांक ३२१/२०२६ भारतीय न्याय संहिता (BNS) कलम ३०५(अ), ३३१(३) व ३३१(४) अन्वये अज्ञात चोरट्यांविरुद्ध गुन्हा दाखल करण्यात आला आहे.
