पाच जणांनी मिळून एकाच कुटुंबाला चोपले! ; लोखंडी गुप्तीने जीवे मारण्याची दिली धमकी
रावेर (प्रतिनिधी) – “माझ्या घरासमोर भांडण करू नका,” असे सांगणे एका शेतकऱ्याला आणि त्याच्या कुटुंबाला भलतेच महागात पडले आहे. या साध्या कारणावरून संतप्त झालेल्या पाच जणांच्या टोळक्याने घरात घुसून एकाच कुटुंबातील सदस्यांना लाथाबुक्क्यांनी बेदम मारहाण केल्याची धक्कादायक घटना रावेर तालुक्यातील पाल येथे घडली आहे. एवढेच नव्हे तर, “तुम्ही आता गावात येऊनच दाखवा, तुम्हाला जिवंत सोडणार नाही, गुप्तीने मारून टाकू,” अशी थेट जीवे मारण्याची धमकीही या टोळक्याने दिली. याप्रकरणी रावेर पोलीस ठाण्यात पाच जणांविरुद्ध दंगलीसह विविध गंभीर कलमांखाली गुन्हा दाखल करण्यात आला आहे.
घरसमोरील भांडणाचा वाद नडला
पोलीस सूत्रांकडून मिळालेल्या सविस्तर माहितीनुसार, पाल (ता. रावेर, जि. जळगाव) येथील रहिवासी विकास खेमसिंग चव्हाण (वय ४०, व्यवसाय- शेती) हे ७ जून २०२६ रोजी संध्याकाळी ६:०० वाजेच्या सुमारास मोरव्हाल फाट्याजवळील आपल्या घरासमोर हजर होते. त्या वेळी संशयित आरोपींच्या गटाचे घरासमोर भांडण सुरू होते. ते पाहून विकास चव्हाण यांनी, “तुम्ही माझ्या घरासमोर भांडण करू नका,” असे त्यांना समजावून सांगितले. मात्र, या गोष्टीचा संशयितांना तीव्र राग आला.
एकत्र येत कुटुंबावर केला हल्ला; महिलांनाही शिवीगाळ
राग अनावर झालेल्या संशयितांनी आपसात संगनमत करून विकास चव्हाण यांच्या घरावर हल्ला चढवला. त्यांनी विकास चव्हाण, त्यांचा भाऊ, पत्नी आणि वृद्ध आई यांना अद्वातद्वा शिवीगाळ करण्यास सुरुवात केली. त्यानंतर टोळक्याने विकास चव्हाण आणि त्यांच्या भावाला चापटबुक्क्यांनी व लाथांनी बेदम मारहाण केली. मारहाण सुरू असतानाच संशयितांनी, “आता तुम्ही गावात पाय ठेवून दाखवा, तुम्हाला जिवंत सोडणार नाही; लोखंडी गुप्तीने खोपसून मारून टाकू,” अशी भीषण धमकी दिल्याने चव्हाण कुटुंब प्रचंड दहशतीखाली आले आहे.
रावेर पोलिसांत दंगलीचा गुन्हा दाखल; आरोपी अद्याप फरार
या घटनेनंतर पीडित विकास चव्हाण यांनी तातडीने रावेर पोलीस ठाणे गाठून फिर्याद दिली. त्यांच्या तक्रारीवरून ७ जून २०२६ रोजी रात्री ११:१८ वाजता रावेर पोलिसांत गुन्हा रजिस्टर क्रमांक २९६/२०२६ अन्वये भारतीय न्याय संहितेच्या (BNS) कलम १८९(१) (बेकायदेशीर जमाव जमवणे), १८९(४) (घातक शस्त्रांसह दंगल), १९१(१), १९०, ११५(२) (इच्छापूर्वक दुखापत करणे), ३५२ (शांतता भंग करणे), आणि ३५१(२)(३) (जीवे मारण्याची धमकी देणे) प्रमाणे पाच जणांवर गुन्हा दाखल करण्यात आला आहे.
या गुन्ह्यात १) रामकिशोर ऊर्फ ईश्वर अर्जुन जाधव, अविनाश अर्जुन जाधव, प्रदीप अर्जुन जाधव, बाळू रामदास चव्हाण, आणि गौरव रामकिशोर जाधव (सर्व राहणार- पाल, ता. रावेर) यांना संशयित आरोपी करण्यात आले आहे. रावेर पोलीस ठाण्याचे पोलीस हेडकॉन्स्टेबल (बकल नंबर २८११) ईश्वर चव्हाण या प्रकरणाचा पुढील सखोल तपास करत आहेत.
