जामनेरमध्ये ३.४० लाखांच्या ट्रान्सफॉर्मर साहित्याची चोरी; अज्ञात चोरट्यांविरुद्ध गुन्हा
जामनेर (प्रतिनिधी) : जामनेर तालुक्यात सुरू असलेल्या एनसीसी लिमिटेड कंपनीच्या कामाच्या ठिकाणावरून सुमारे ३ लाख ४० हजार रुपयांचे ट्रान्सफॉर्मरमधील तांब्याचे साहित्य व इतर उपकरणे चोरीला गेल्याची घटना उघडकीस आली आहे. याप्रकरणी जामनेर पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, जामनेर गावातील एनसीसी लिमिटेड कंपनीच्या साईटवर ३१ मे २०२६ रोजी दुपारी १ ते १ जून २०२६ रोजी सकाळी ११ वाजेच्या दरम्यान अज्ञात चोरट्यांनी दोन ५ एमव्हीए (MVA) ट्रान्सफॉर्मर फोडून त्यातील मौल्यवान साहित्य लंपास केले.
चोरीमध्ये सुमारे २,२०,००० रुपये किमतीचे २,२०० किलो वजनाचे साहित्य तसेच १,२०,००० रुपये किमतीचे १,२०० किलो वजनाचे साहित्य असा एकूण ३,४०,००० रुपयांचा ऐवज चोरीला गेला.
चोरट्यांनी ट्रान्सफॉर्मरमधील ऑइल काढून टाकत टॉप योक कोअर, WTI आणि OTI कॅपिलरी ट्यूब, MSEDCL सील, टॉप कव्हर, इन्स्पेक्शन विंडो बोल्ट-गॅस्केट, केबल, OSR एअर रिलीज प्लग, पर्मा रिंग तसेच तिन्ही फेजमधील तांब्याच्या कॉईलसह विविध साहित्य तोडफोड करून चोरून नेल्याचे फिर्यादीत नमूद आहे.
याप्रकरणी दिलीप सुमन मद्दुला (वय ३८), सिव्हिल इंजिनिअर, एनसीसी लिमिटेड यांनी दिलेल्या फिर्यादीवरून जामनेर पोलीस ठाण्यात भारतीय न्याय संहिता (BNS) २०२३ मधील कलम ३०३(२) व ३२४(५) अन्वये अज्ञात चोरट्यांविरुद्ध गुन्हा दाखल करण्यात आला आहे.
या गुन्ह्याचा पुढील तपास पोलीस उपनिरीक्षक किशोर पाटील करीत आहेत.
