जळगाव जिल्ह्यातील ५३ हजार ८९६ पात्र लाभार्थ्यांची यादी जाहीर; अग्रीस्टॅक फार्मर आयडी अनिवार्य
जळगाव, : पुण्यश्लोक अहिल्यादेवी होळकर शेतकरी कर्जमुक्ती योजना २०२६ अंतर्गत जळगाव जिल्ह्यातील पात्र शेतकऱ्यांची यादी जाहीर करण्यात आली असून, जिल्ह्यातील एकूण ५३ हजार ८९६ शेतकरी या योजनेसाठी पात्र ठरले आहेत. या सर्व पात्र लाभार्थ्यांनी कर्जमाफीचा लाभ मिळविण्यासाठी तातडीने आधार प्रमाणीकरण करून घ्यावे, असे आवाहन जिल्हा प्रशासनाने केले आहे.
जळगाव जिल्हा मध्यवर्ती सहकारी बँक लि. तसेच विविध कार्यकारी सेवा सहकारी संस्थांमधील पात्र शेतकऱ्यांची यादी २४ जुलै २०२६ रोजी प्राप्त झाली असून, संबंधित संस्थांचे सचिव, संस्थांची कार्यालये आणि जिल्हा मध्यवर्ती सहकारी बँकेच्या शाखांमध्ये ही यादी उपलब्ध करून देण्यात आली आहे.
योजनेचा लाभ घेण्यासाठी पात्र शेतकऱ्यांकडे अग्रीस्टॅक (AgriStack) फार्मर आयडी असणे अनिवार्य आहे. ज्या शेतकऱ्यांनी अद्याप अग्रीस्टॅक नोंदणी केलेली नाही, त्यांनी तात्काळ जवळच्या आपले सरकार सेवा केंद्र (CSC) येथे जाऊन नोंदणी करून घ्यावी.
तसेच, कर्जमाफीचा लाभ मिळण्यासाठी पात्र शेतकऱ्यांनी आपल्या जवळच्या आपले सरकार केंद्र, सीएससी केंद्र किंवा जिल्हा मध्यवर्ती सहकारी बँकेच्या शाखेत जाऊन आधार प्रमाणीकरण करून घेणे आवश्यक आहे. ही प्रक्रिया जिल्ह्यातील सर्व संबंधित केंद्रांवर उपलब्ध करण्यात आली आहे.
आधार प्रमाणीकरणाची प्रक्रिया पूर्णपणे विनामूल्य असून, यासाठी कोणत्याही केंद्रावर कोणतेही शुल्क आकारले जाणार नाही. पात्र लाभार्थ्यांनी कोणालाही कोणतीही रक्कम देऊ नये, असे आवाहन जिल्हा उपनिबंधक महेशकुमार गायकवाड यांनी केले आहे.
