वणकोठे गावातील घटना; ३५ हजारांची होंडा शाईन मोटारसायकल चोरी
एरंडोल ( प्रतिनिधी ) :- तालुक्यातील वणकोठे गावात घरासमोर उभी असलेली होंडा शाईन मोटारसायकल अज्ञात चोरट्याने चोरून नेल्याची घटना घडली. याप्रकरणी कासोदा पोलिस ठाण्यात अज्ञात आरोपीविरुद्ध चोरीचा गुन्हा दाखल करण्यात आला आहे.
पोलिसांनी दिलेल्या माहितीनुसार, जीवन पंढरीनाथ पवार (वय ४९, रा. वणकोठे, ता. एरंडोल) यांनी आपली काळ्या रंगाची होंडा कंपनीची सीबी शाईन (क्र. एमएच-१९ डीजी-००७२) ही मोटारसायकल घरासमोर अंगणात उभी केली होती. ६ जून रोजी रात्री २ वाजेपासून ते ७ जून रोजी सकाळी ८ वाजेदरम्यान अज्ञात चोरट्याने दुचाकी चोरून नेली.
चोरीस गेलेल्या मोटारसायकलीची किंमत सुमारे ३५ हजार रुपये असल्याचे तक्रारीत नमूद करण्यात आले आहे. दुचाकी आढळून न आल्याने जीवन पवार यांनी कासोदा पोलिस ठाण्यात फिर्याद दिली.
या प्रकरणी भारतीय न्याय संहितेच्या कलम ३०३(२) अन्वये गुन्हा दाखल करण्यात आला असून पोलिसांनी अज्ञात चोरट्याचा शोध सुरू केला आहे. पुढील तपास पोना. नरेंद्र महादू पाटील करीत आहेत.
