पतीसह आई-वडील आणि सासू-सासऱ्यांवर ‘पोक्सो’ अंतर्गत गुन्हा दाखल
जळगाव (प्रतिनिधी):- जळगाव जिल्ह्यातील चाळीसगाव तालुक्यातील एका गावात एका अल्पवयीन मुलीचा बालविवाह लावून देत तिच्यावर अत्याचार केल्याची एक अत्यंत धक्कादायक आणि गंभीर घटना समोर आली आहे. या खळबळजनक प्रकरणाची माहिती मिळताच मेहुणबारे पोलिसांनी तातडीने पावले उचलत पीडित मुलीच्या पतीसह, तिचे जन्मदाते आई-वडील आणि सासू-सासऱ्यांविरुद्ध भारतीय न्याय संहिता (BNS), पोक्सो (POCSO) कायदा आणि बालविवाह प्रतिबंधक अधिनियमाच्या विविध कडक कलमान्वये गुन्हा दाखल केला आहे. या अमानुष कृत्यामुळे संपूर्ण तालुक्यात संतापाची लाट उसळली आहे.
प्राप्त माहितीनुसार, पीडित मुलगी ही केवळ १६ वर्षे वयाची म्हणजेच कायदेशीररित्या अल्पवयीन असल्याचे पूर्णपणे माहिती असतानाही, तिच्या नातेवाईकांनी १९ ऑगस्ट २०२४ रोजी तिचा विवाह लावून दिला होता. हा बेकायदेशीर बालविवाह पीडित मुलीची आई, वडील आणि तिचे सासू व सासरे यांनी संगनमत करून घडवून आणला होता. धक्कादायक बाब म्हणजे, विवाहानंतर दहिंवद येथील आरोपी पतीच्या घरी १७ मे २०२६ पर्यंतच्या कालावधीत, मुलीच्या अल्पवयीन असण्याचा कोणताही विचार न करता तिच्या संमतीशिवाय तिच्याशी वारंवार जबरदस्तीने शारीरिक संबंध प्रस्थापित करण्यात आले. या सततच्या अत्याचारामुळे ही अल्पवयीन पीडिता गर्भवती राहिली असून हा सर्व प्रकार अखेर उघडकीस आला आहे.
हा गंभीर प्रकार समोर आल्यानंतर २३ मे २०२६ रोजी रात्री मेहुणबारे पोलीस ठाण्यात गुन्हा रजिस्टर दाखल करण्यात आला. पोलिसांनी या प्रकरणी संशयित पती, पीडितेची आई आणि वडील (दोन्ही रा. शिवणी, ता. भडगाव) तसेच तिची सासू आणि सासरे (दोन्ही रा. दहिंवद, ता. चाळीसगाव) अशा एकूण पाच जणांविरुद्ध गुन्ह्याची नोंद केली आहे. आरोपींवर भारतीय न्याय संहिता २०२३ चे कलम ६४(१), ६४(२), ६४(ह), ६४(म), ६५(१) सह पोक्सो कायदा २००६ चे कलम ४, ५(L), ५(J)(२), ६, ८, १२ आणि बालविवाह प्रतिबंधक अधिनियम २००६ चे कलम ९, १०, ११ अन्वये गुन्हे दाखल करण्यात आले आहेत. घटनेची माहिती मिळताच सहाय्यक पोलीस निरीक्षक प्रवीण दातरे यांनी घटनास्थळाला भेट देऊन परिस्थितीची पाहणी केली असून, या प्रकरणाचा पुढील सखोल तपास पोलीस उपनिरीक्षक सुहास आव्हाड करत आहेत.
