जळगाव (प्रतिनिधी):- शहरातील जुना आसोदा रोडवरील गजानन नगर भागात एका पोलीस पाटीलाच्या बंद घराचे कुलूप तोडून अज्ञात चोरट्यांनी १ लाख २७ हजार ०८० रुपयांचे सोन्याचे दागिने आणि रोकड चोरून नेल्याची धक्कादायक घटना उघडकीस आली आहे. याप्रकरणी शनीपेठ पोलीस ठाण्यात घरफोडीचा गुन्हा दाखल करण्यात आला आहे.
मिळालेल्या माहितीनुसार, यावल तालुक्यातील आडगाव येथील पोलीस पाटील धर्मराज रामदास बाविस्कर (वय ४०) हे सध्या जळगाव शहरातील श्रीराम चौकाजवळ गजानन नगर येथील प्लॉट नंबर १, रूम नंबर ४ मध्ये भाड्याने राहतात. गुरुवार, १४ मे रोजी रात्री ८:०० वाजेच्या सुमारास ते घराला कुलूप लावून बाहेर गेले होते. दरम्यानच्या काळात अज्ञात चोरट्यांनी त्यांच्या बंद घराला लक्ष्य केले.
चोरट्यांनी बाविस्कर यांच्या घराच्या मुख्य दरवाजाचे कुलूप तोडून आत प्रवेश केला. घरातील बेडरूममध्ये ठेवलेली बॅग शोधून त्यातील ८० हजार ५८० रुपये किमतीचे १० ग्रॅम वजनाचे सोन्याचे मंगळसूत्र, ३१ हजार ५०० रुपयांची ५ ग्रॅम वजनाची सोन्याची अंगठी आणि १५ हजार रुपयांची रोकड असा एकूण १ लाख २७ हजार ०८० रुपयांचा मुद्देमाल स्वतःच्या आर्थिक फायद्यासाठी चोरून पोबारा केला. शुक्रवार, १५ मे रोजी सकाळी ८:०० वाजता बाविस्कर हे घरी परतले असता हा चोरीचा प्रकार उघडकीस आला.
घटनेची माहिती मिळताच जळगाव विभागाचे उपविभागीय पोलीस अधिकारी (SDPO) श्री. नितीन गणपुरे आणि शनीपेठ पोलीस ठाण्याचे सहाय्यक पोलीस निरीक्षक साजिद माजिद मन्सुरी यांनी तातडीने पथकासह घटनास्थळी धाव घेऊन पाहणी केली.
या संदर्भात धर्मराज बाविस्कर यांच्या फिर्यादीवरून शनीपेठ पोलीस ठाण्यात अज्ञात चोरट्याविरुद्ध भारतीय न्याय संहितेच्या (BNS) कलम ३०५(A), ३३१(३) आणि ३३१(४) अन्वये गुन्हा दाखल करण्यात आला आहे. या घटनेचा पुढील तपास पोलीस हेड कॉन्स्टेबल विजय विनोद खैरे करत आहेत. शहरात एका पोलीस पाटीलाचेच घर फुटल्याने परिसरातील नागरिकांमध्ये सुरक्षिततेबाबत चिंतेचे वातावरण पसरले आहे.
