रोख रकमेसह महागडा मोबाईल चोरीला; एमआयडीसी पोलीस ठाण्यात अज्ञात चोरट्याविरुद्ध गुन्हा दाखल
जळगाव (प्रतिनिधी) — जळगाव शहरातील श्रीकृष्ण मंदिराजवळील काके वाडी परिसरात ७४ वर्षीय शेतकऱ्याच्या घरात अज्ञात चोरट्याने प्रवेश करून रोख रकमेसह मोबाईल असा एकूण सुमारे २१ हजार रुपयांचा मुद्देमाल लंपास केल्याची घटना समोर आली आहे. याप्रकरणी एमआयडीसी पोलीस ठाण्यात अज्ञात चोरट्याविरुद्ध घरफोडीचा गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी चंद्रकांत द्वारकानाथ पाटील (वय ७४, व्यवसाय शेती), रा. प्लॉट नं. ११/२, काके वाडी, श्रीकृष्ण मंदिराजवळ, जळगाव हे आपल्या कुटुंबासह राहतात. दिनांक ३ ऑक्टोबर २०२६ रोजी रात्री ११ वाजेपासून ते ४ ऑक्टोबर रोजी सकाळी ६.४५ वाजेच्या दरम्यान ही घरफोडी झाली.
अज्ञात चोरट्याने घराच्या जिन्यातील दरवाजातून घरात प्रवेश केला. त्यानंतर फिर्यादीच्या शर्टच्या वरच्या खिशात ठेवलेली १० हजार रुपयांची रोकड, तसेच त्यांच्या पत्नीच्या कपड्यांच्या पिशवीत ठेवलेली ६ हजार रुपयांची रोकड चोरून नेली. याशिवाय सुमारे ५ हजार रुपये किमतीचा एमआय कंपनीचा मोबाईल फोन असा एकूण २१ हजार रुपयांचा मुद्देमाल चोरट्याने लंपास केला.
घटना लक्षात आल्यानंतर फिर्यादीने एमआयडीसी पोलीस ठाण्यात तक्रार दाखल केली. त्यांच्या फिर्यादीवरून गुन्हा रजिस्टर क्रमांक ८१७/२०२६ अन्वये भारतीय न्याय संहितेच्या कलम ३०५(अ), ३३१(४) प्रमाणे गुन्हा दाखल करण्यात आला आहे.
या प्रकरणाचा तपास पोहेकॉ/२८४५ प्रमोद लाडवंजारी, एमआयडीसी पोलीस ठाणे, जळगाव करीत आहेत. अज्ञात चोरट्याचा शोध घेण्यासाठी पोलिसांकडून तपास सुरू असून, परिसरातील सीसीटीव्ही फुटेज तसेच इतर पुराव्यांच्या आधारे चोरट्याचा माग काढला जात आहे.
