निमखेडी शिवारातील राष्ट्रीय महामार्ग क्रमांक ५३ वर अपघात; धडक देऊन अज्ञात चालक वाहनासह फरार
जळगाव (प्रतिनिधी) — जळगाव शहरातील निमखेडी शिवारात राष्ट्रीय महामार्ग क्रमांक ५३ वर अज्ञात वाहनाने दुचाकीस्वाराला जोरदार धडक दिल्याने झालेल्या अपघातात ४२ वर्षीय शेतकरी समाधान भगवान कोळी यांचा उपचारादरम्यान मृत्यू झाला. अपघातानंतर अज्ञात वाहनचालक वाहनासह घटनास्थळावरून फरार झाला. याप्रकरणी जळगाव तालुका पोलीस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, समाधान भगवान कोळी (वय ४२), रा. प्लॉट क्रमांक १६, गट क्रमांक ७६६, शिवधाम मंदिराजवळ, निमखेडी शिवार, जळगाव हे १ ऑक्टोबर २०२६ रोजी सायंकाळी साडेपाच वाजेच्या सुमारास काम आटोपून घरी परत जात होते.
निमखेडी शिवारातील साई पॅलेस हॉटेलजवळ राष्ट्रीय महामार्ग क्रमांक ५३ वरून जात असताना अज्ञात वाहनावरील चालकाने रस्त्याच्या परिस्थितीकडे दुर्लक्ष करून वाहन भरधाव वेगाने चालविले. यावेळी त्याने समाधान कोळी यांना जोरदार धडक दिली. या अपघातात त्यांच्या डोक्याला गंभीर दुखापत झाली.
गंभीर जखमी अवस्थेत समाधान कोळी यांना उपचारासाठी रुग्णालयात दाखल करण्यात आले. मात्र, उपचारादरम्यान त्यांचा मृत्यू झाला. दरम्यान, अपघाताची माहिती न देता अज्ञात वाहनचालकाने वाहनासह घटनास्थळावरून पलायन केल्याचे तक्रारीत नमूद करण्यात आले आहे.
याप्रकरणी ४ ऑक्टोबर २०२६ रोजी रात्री १२.३० वाजता जळगाव तालुका पोलीस ठाण्यात गुन्हा रजिस्टर क्रमांक ३०२/२०२६ अन्वये भारतीय न्याय संहितेच्या कलम १०६(१), २८१, १२५(अ), १२५(ब) तसेच मोटार वाहन अधिनियमातील कलम १३४(ब), १८४ प्रमाणे गुन्हा दाखल करण्यात आला आहे.
या प्रकरणाचा पुढील तपास पोलीस उपनिरीक्षक शामकुमार मोरे करीत आहेत. अपघातास कारणीभूत ठरलेल्या अज्ञात वाहनाचा आणि चालकाचा शोध घेण्यासाठी पोलिसांकडून तपास सुरू आहे.
