आदिवासी विद्यार्थ्यांच्या एसटीसाठी जळगावच्या कॉम्प्युटर असोसिएशनचा पुढाकार!

जळगाव ( प्रतिनिधी ) :- शिक्षणासाठी दररोज तब्बल १० किलोमीटरचा पायी प्रवास करणाऱ्या आदिवासी विद्यार्थ्यांच्या एसटी बसच्या मागणीला अखेर सकारात्मक प्रतिसाद मिळाला. पवनानगर येथे आपल्या मागणीसाठी रस्त्यावर उतरलेल्या विद्यार्थ्यांच्या आंदोलनात जळगाव कॉम्प्युटर्स असोसिएशनच्या सदस्यांनी सहभाग घेत मध्यस्थीची भूमिका बजावली. विद्यार्थ्यांना पाणी वाटप करण्यासोबतच महामंडळाचे अधिकारी आणि शिक्षण विभागाच्या अधिकाऱ्यांशी चर्चा करून त्यांचा प्रश्न मार्गी लावण्यासाठी JJITAच्या सदस्यांनी पुढाकार घेतला.

दिनांक १ ऑक्टोबर रोजी दुपारी सुमारे १.३० वाजेपर्यंत पवनानगर येथे आदिवासी विद्यार्थ्यांचे आंदोलन सुरू होते. हे विद्यार्थी दररोज सुमारे ५ किलोमीटर पायी चालत शाळेत जातात. ये-जा धरून त्यांना दररोज जवळपास १० किलोमीटरचा प्रवास करावा लागत असल्याने शाळेत जाण्यासाठी एसटी बससेवेची मागणी त्यांनी केली होती.

विद्यार्थ्यांनी एसटी बससेवेबाबत महामंडळ तसेच शिक्षणाधिकारी यांच्याकडे मागील वर्षभरापासून मागणी केली होती. मात्र, त्यांच्या मागणीवर अपेक्षित कार्यवाही होत नसल्याने अखेर विद्यार्थ्यांना आंदोलनाचा मार्ग स्वीकारावा लागला.

उन्हात रस्त्यावर बसून आपल्या मागणीसाठी आंदोलन करणाऱ्या विद्यार्थ्यांची परिस्थिती पाहून जळगाव कॉम्प्युटर्स असोसिएशनच्या सदस्यांनी आंदोलनात सहभागी होण्याचा निर्णय घेतला. विद्यार्थ्यांना पाण्याच्या बाटल्यांचे वाटप करून त्यांच्या आंदोलनाला नैतिक पाठिंबा देण्यात आला.

केवळ आंदोलनात सहभागी होण्यापुरती भूमिका न ठेवता JJITAच्या सदस्यांनी महामंडळाचे अधिकारी आणि शिक्षण विभागाच्या अधिकाऱ्यांशी चर्चा केली. विद्यार्थ्यांची नेमकी अडचण, त्यांचा दररोजचा पायी प्रवास आणि एसटी सेवेची असलेली गरज अधिकाऱ्यांच्या निदर्शनास आणून देण्यात आली.

या मध्यस्थीनंतर विद्यार्थ्यांच्या प्रश्नावर सकारात्मक तोडगा काढण्याच्या दृष्टीने प्रक्रिया सुरू झाली आणि आंदोलन मागे घेण्यात आले. त्यामुळे वर्षभरापासून प्रलंबित असलेल्या विद्यार्थ्यांच्या मागणीला आता दिशा मिळाल्याचे चित्र आहे.

या विद्यार्थ्यांच्या प्रश्नासाठी सामाजिक कार्यकर्ते भगवान माने सातत्याने लढा देत होते. त्यांच्या पाठपुराव्याला जळगावच्या कॉम्प्युटर्स असोसिएशनने मध्यस्थीची जोड दिल्याने विद्यार्थ्यांचा प्रश्न संबंधित अधिकाऱ्यांपर्यंत प्रभावीपणे पोहोचला.

ट्रिपच्या निमित्ताने पवनानगर परिसरातून जात असताना आंदोलन करणाऱ्या विद्यार्थ्यांची अडचण लक्षात आल्यानंतर असोसिएशनच्या सदस्यांनी घेतलेला पुढाकार हा केवळ सामाजिक बांधिलकीचा विषय नसून विद्यार्थ्यांच्या शिक्षणाच्या हक्कासाठी उभे राहण्याचा आदर्श ठरल्याची भावना व्यक्त करण्यात आली.

दररोज उन्हात पायी शाळेत जाणाऱ्या विद्यार्थ्यांना एसटीची सुविधा मिळावी, ही त्यांची मागणी रास्त असल्याचे सांगत असोसिएशनच्या सदस्यांनी त्यांच्या आंदोलनाला पाठिंबा दिला. व्यवसायासोबत सामाजिक बांधिलकी जपण्याचे काम JJITAच्या सदस्यांनी केले असून, या कार्याचा अभिमान वाटत असल्याची भावना सदस्यांनी व्यक्त केली.

पवनानगरातील या घटनेतून प्रशासनाने विद्यार्थ्यांच्या मूलभूत अडचणींकडे वेळेत लक्ष देणे किती गरजेचे आहे, हे पुन्हा एकदा अधोरेखित झाले आहे.