विहिरीत सुमारे १५ मिनिटे लटकवून ठेवले; चापटांनी मारहाण करून व्हिडिओ व्हायरल केल्याचा आरोप
यावल (प्रतिनिधी) — यावल तालुक्यातील दहिगाव शिवारात दिव्यांग व्यक्तीला विहिरीत उलटे लटकवून त्याची अमानुष मारहाण केल्याची धक्कादायक घटना समोर आली आहे. याप्रकरणी यावल पोलिसांनी दोन संशयित आरोपींना अटक केली असून, त्यांच्या एका अनोळखी साथीदाराचाही शोध सुरू आहे.
याबाबत यावल पोलीस ठाण्यात गुन्हा रजिस्टर क्रमांक ३५८/२०२६ अन्वये भारतीय न्याय संहितेतील कलम ११०, १४०(३), ११५(२), ३५६(२), ३(५) तसेच दिव्यांग व्यक्तींचे हक्क कायदा २०१६ मधील कलम ९२ अन्वये सदोष मनुष्यवधाचा प्रयत्न आणि इतर कलमांनुसार गुन्हा दाखल करण्यात आला आहे.
पोलिसांनी दिलेल्या माहितीनुसार, दहिगाव येथील नामदेव रामदास पाटील (वय ५०, व्यवसाय शेती) यांनी फिर्याद दिली आहे. दहिगावपासून सुमारे एक किलोमीटर अंतरावर न्हावरा रोडलगत वेडू शंकर पाटील यांच्या मालकीच्या विहिरीजवळ २८ सप्टेंबर रोजी दुपारी १.३० ते २ वाजेच्या सुमारास ही घटना घडल्याचे फिर्यादीत नमूद आहे.
आरोपी नितीन ऊर्फ मुन्ना सुनील पाटील (वय अंदाजे २३) आणि पंकज ऊर्फ झग्या संतोष पाटील (वय अंदाजे २२), दोघेही दहिगाव येथील रहिवासी, यांनी फिर्यादीचे दोन्ही पाय पकडून त्याला सुमारे १५ मिनिटे विहिरीत उलटे लटकवून ठेवले. त्यानंतर त्याची अंडरपँट काढून त्याला नग्न करून चापटांनी मारहाण केल्याचा आरोप आहे.
यावेळी आरोपींच्या एका अनोळखी साथीदाराने विहिरीजवळ उभे राहून मोबाईलमध्ये या घटनेचा व्हिडिओ तयार केला. फिर्यादीला विहिरीत लटकवून ठेवले असताना त्याचे पाय निसटले असते तर तो विहिरीत पडून जीव गमावू शकला असता, याची जाणीव आरोपींना असतानाही त्यांनी हे कृत्य केल्याचे फिर्यादीत म्हटले आहे.
विशेष म्हणजे, फिर्यादी दिव्यांग असल्याची माहिती आरोपींना असतानाही केवळ त्याची टिंगलटवाळी करण्यासाठी व त्यास घाबरविण्याच्या उद्देशाने हे कृत्य करण्यात आल्याचा आरोप आहे. आरोपींनी केलेला व्हिडिओ व्हॉट्सॲपवर व्हायरल करून फिर्यादीची समाजात बदनामी केल्याचेही तक्रारीत नमूद करण्यात आले आहे.
घटनेनंतर फिर्यादीने दिलेल्या तक्रारीवरून यावल पोलीस ठाण्यात गुन्हा दाखल करण्यात आला. या प्रकरणाचा तपास सपोनी अजयकुमार वाढवे यांच्या मार्गदर्शनाखाली सुरू असून, पोलिसांनी दोन आरोपींना अटक केली आहे. तसेच घटनेतील अनोळखी साथीदाराचा शोध घेतला जात आहे.
