चाळीसगाव (प्रतिनिधी):- शहरातील लक्ष्मी नगर भागामध्ये एका महिला डॉक्टरच्या दवाखान्याच्या नवीन इमारतीचे काम सुरू असताना, अज्ञात चोरट्याने इमारतीमध्ये फिटिंग केलेली ७४ हजार रुपये किमतीची कॉपर वायर चोरून नेल्याची धक्कादायक घटना उघडकीस आली आहे. याप्रकरणी चाळीसगाव शहर पोलीस ठाण्यात चोरीचा गुन्हा दाखल करण्यात आला आहे.
पोलीस सूत्रांनी दिलेल्या माहितीनुसार, लक्ष्मी नगर (शिवाय लँडजवळ) येथील रहिवासी डॉ. सौ. राखी कपिल लढ्ढा (वय ३९) यांच्या नवीन हॉस्पिटलच्या इमारतीचे बांधकाम सध्या प्रगतीपथावर आहे. ७ मे रोजी रात्री ११:०० वाजेच्या सुमारास कामगार काम बंद करून गेले होते. दरम्यान, मध्यरात्रीच्या सुमारास अज्ञात चोरट्याने बांधकाम सुरू असलेल्या इमारतीचा आणि अंधाराचा फायदा घेऊन आत प्रवेश केला. चोरट्याने इमारतीमध्ये इलेक्ट्रिकल फिटिंगसाठी टाकलेली वेगवेगळ्या जाडीची एकूण ४ हजार ९० मीटर लांबीची ‘आरआर केबल’ कंपनीची कॉपर (तांब्याची) वायर भिंतींमधून ओढून काढली आणि चोरून नेली.
यामध्ये २५ हजार रुपयांची १९०० मीटर (१ मि.मी.) वायर, २० हजार रुपयांची १२०० मीटर (१.५ मि.मी.) वायर, १५ हजार रुपयांची ६०० मीटर (२.५ मि.मी.) वायर, १० हजार रुपयांची ३०० मीटर (४ मि.मी.) वायर आणि ४ हजार रुपयांची ९० मीटर (६ मि.मी.) वायर अशा एकूण ७४,००० रुपये किमतीच्या वायरींचा समावेश आहे. दुसऱ्या दिवशी म्हणजेच ८ मे रोजी सकाळी १०:०० वाजता कामगार आणि डॉक्टर इमारतीवर आले असता हा चोरीचा प्रकार उघडकीस आला. सुरुवातीला स्वतःच्या पातळीवर शोध घेतल्यानंतर अखेर डॉ. राखी लढ्ढा यांनी पोलीस ठाण्यात रीतसर तक्रार दिली.
डॉ. राखी लढ्ढा यांनी दिलेल्या तक्रारीवरून चाळीसगाव शहर पोलीस ठाण्यात अज्ञात चोरट्याविरुद्ध भारतीय न्याय संहितेच्या (BNS) कलम ३०३(२) अन्वये गुन्हा दाखल करण्यात आला आहे. या प्रकरणाचा पुढील तपास सहाय्यक पोलीस उपनिरीक्षक (सफौ) अजय मालचे करत आहेत. शहरात बांधकामे सुरू असलेल्या ठिकाणी मौल्यवान साहित्यांच्या चोऱ्या वाढल्याने बांधकाम व्यावसायिकांमध्ये आणि नागरिकांमध्ये चिंतेचे वातावरण पसरले आहे.
