NRAI कडून अधिकृत लायसन्सधारक प्रशिक्षक म्हणून मान्यता; गगन नारंग यांच्या हस्ते सन्मान
जळगाव (प्रतिनिधी):- क्रीडा क्षेत्रात आपल्या नेमबाजी कौशल्याचा ठसा उमटविणारे जळगाव जिल्हा रायफल असोसिएशनचे राष्ट्रीय सुवर्णपदक विजेते खेळाडू व प्रशिक्षक किरण सुरेश पाटील यांना ‘नॅशनल रायफल असोसिएशन ऑफ इंडिया’ (NRAI) तर्फे “डिप्लोमा इन शूटिंग कोचिंग” प्रदान करून गौरविण्यात आले.
दि. ८ मे २०२६ रोजी मध्य प्रदेशातील भोपाळ येथील एम.पी. स्टेट शूटिंग अकॅडमीमध्ये हा पदवी प्रदान सोहळा दिमाखात पार पडला. २०१२ लंडन ऑलिंपिकमधील कांस्यपदक विजेते तसेच भारतीय ऑलिंपिक असोसिएशनचे उपाध्यक्ष गगन नारंग यांच्या हस्ते किरण पाटील यांना हा प्रतिष्ठेचा डिप्लोमा प्रदान करण्यात आला.
या विशेष पदवीमुळे किरण पाटील यांचा आता नॅशनल रायफल असोसिएशन ऑफ इंडियाच्या अधिकृत लायसन्सधारक प्रशिक्षकांच्या निवडक यादीत समावेश झाला आहे. त्यांच्या या यशामुळे भविष्यात जळगाव जिल्ह्यात राष्ट्रीय व आंतरराष्ट्रीय स्तरावरील गुणवत्तापूर्ण नेमबाज घडविण्यास मोठी मदत होणार असल्याचे मानले जात आहे.
या पदवी प्रदान सोहळ्यास भारतीय रायफल असोसिएशनचे जनरल सेक्रेटरी पवन कुमार सिंग, मध्य प्रदेश रायफल असोसिएशनचे स्टेट सेक्रेटरी राकेश गुप्ता यांच्यासह क्रीडा क्षेत्रातील अनेक मान्यवर उपस्थित होते.
“योग्य मार्गदर्शनातूनच ऑलिंपिकचे स्वप्न साकार होऊ शकते. किरण पाटील यांच्यासारख्या प्रमाणित प्रशिक्षकांमुळे भारतीय नेमबाजीला नवी दिशा मिळेल,” अशी भावना यावेळी व्यक्त करण्यात आली.
दरम्यान, किरण पाटील यांच्या या उल्लेखनीय यशाबद्दल असोसिएशनचे अध्यक्ष विशन मिलवाणी, उपाध्यक्ष प्रा. यशवंत सैंदाणे, सचिव व मुख्य प्रशिक्षक दिलीप गवळी, खजिनदार विलास जुनागडे, सहसचिव सुनील पालवे, प्रसिद्धीप्रमुख प्रा. विनोद कोचुरे तसेच पुरुषोत्तम सारस्वत यांनी अभिनंदन करून शुभेच्छा दिल्या आहेत.
