जळगाव (प्रतिनिधी):- जामनेर तालुक्यातील मोयगाव येथे अज्ञात चोरट्याने घरफोडी करून सोन्याचे दागिने आणि रोकड असा तब्बल ३ लाख ३७ हजार ६४४ रुपयांचा ऐवज लंपास केल्याची घटना उघडकीस आली आहे. या प्रकरणी पोलिसांनी तत्काळ तपास करत संशयिताला अटक केली आहे.
मिळालेल्या माहितीनुसार, रविंद्र पांडुरंग पाटील (वय ४२, व्यवसाय शेती, रा. मोयगाव, ता. जामनेर) यांच्या राहत्या घरात ९ मे रोजी रात्री ११ ते १० मे रोजी सकाळी ८ वाजेदरम्यान घरफोडी झाली. अज्ञात चोरट्याने घरात प्रवेश करून कपाटातील सोन्याचे दागिने आणि रोकड चोरून नेली.
चोरीमध्ये २०.४३० ग्रॅम वजनाची सोन्याची चेन, २.४४० ग्रॅम वजनाचे सोन्याचे कानातील दागिने, ०.८८० ग्रॅम वजनाची सोन्याची नथ तसेच १ लाख ४१ हजार ५६० रुपयांची रोकड असा एकूण ३ लाख ३७ हजार ६४४ रुपयांचा ऐवज लंपास करण्यात आला.
या प्रकरणी पहूर पोलीस ठाण्यात घरफोडीचा गुन्हा दाखल करण्यात आला होता. तपासादरम्यान पोलिसांनी सोपान मुरलीधर कवळे (वय ३५, रा. मोयगाव, ता. जामनेर) याला संशयित म्हणून ताब्यात घेतले. पुढील चौकशीनंतर त्याला अटक करण्यात आली.
ही कारवाई उपविभागीय पोलीस अधिकारी बापू रोहोम यांच्या मार्गदर्शनाखाली सहाय्यक पोलीस निरीक्षक प्रमोद कठोरे आणि पोलीस उपनिरीक्षक गणेश सुस्ते यांच्या पथकाने केली. पुढील तपास सुरू आहे.
